Yanditswe na: NDAYISENGA Clement
27/11/2025 13:56
Korali, amatsinda yo kuramya no guhimbaza Imana ndetse n’abahanzi ku giti cyabo bo muri ADEPR bari kugendera ku mabwiriza mashya agenga ababarizwa muri iri Torero ryiyita iry’Umwuka.
Ayo mabwiriza agizwe n’ingingo 59, yatangiye gukurikizwa ku wa 17 Ugushyingo 2025, ari na wo munsi yashyiriweho umukono n’Umushumba Mukuru w’Itorero ADEPR, Pst Ndayizeye Isaïe n’Umushumba Mukuru wungirije wa ADEPR, Pst Rutagarama Eugène.
Amabwiriza mashya yasimbuye ayo ku wa 16 Werurwe 2018, agenga korali, itsinda ryo kuramya no guhimbaza Imana ndetse n’abaririmbyi ku giti cyabo yagenderwagaho n’abo muri ADEPR.
Asobanura mu buryo burambuye imiterere y’umuyoboke wa ADEPR, amahame agomba gukurikiza mu rugendo rwe rwa gikirisitu.
Muri ayo mabwiriza ADEPR igaragaza uko korali ziteye, amabwiriza azigenga, uko abayobozi bazo batorwa n’ubumenyi bagomba kuba bafite, uko abaririmbyi bazinjiramo n’ibyo bagomba kuba bujuje, uko batumirwa mu itorero no hanze yaryo n’ibindi.
ADEPR yemera korali zirimo iz’abana kuva ku bafite hagati y’imyaka 5-7 y'amavuko, izo mu bigo by’amashuri, n’iz’abakuru.
Mu mabwiriza mashya, mu bayobozi b’itsinda, Perezida na Visi Perezida bagomba kuba bafite amashuri atandatu yisumbuye mu gihe abandi bari muri komite basabwa nibura atatu yisumbuye.
Komite ya korali igira manda y’imyaka ibiri ishobora kongerwa inshuro ebyiri. Uwatowe ashobora kongera kwiyamamaza nyuma y’uko hagati ya manda ze [ebyiri] n’iz’abandi hanyuzemo izindi ebyiri.
Undi mwihariko washyizwe ku bagiye kwinjira muri korali kuko mu byo basabwa usibye kuba abayoboke ba ADEPR cyangwa bamazemo amezi atandatu, bagomba kuba batarahamwe n’icyaha cya Jenoside yakorewe Abatutsi, icy’ingengabitekerezo yayo, icy’ivangura, icyo gukurura amacakubiri cyangwa ikindi cyaha kidasaza.
Abaririmbyi kandi bamaze kwinjira mu muhamagaro wo kuririmba basabwa gutunga Bibiliya, igitabo cy’indirimbo n’impuzankano za korali. Ibi ni inyongera ku bindi birimo kubaha itorero, imyemerere yaryo n’ubuyobozi bwaryo.
Ku muhanzi uririmba ku giti cye we, ADEPR yemera gusa ufite imyaka 18 y'amavuko ifatwa nk’iy’ubukure, umaze amezi 6 muri ADEPR, afite umuhamagaro wo kuvuga ubutumwa bwiza. Agomba kuba azi gusoma kwandika no kubara, ari indakemwa mu mico n’imyifatire, arangwa n’imbuto z’Umwuka Wera, yitabira gahunda z’itorero kandi indirimbo ze zishingiye ku ijambo ry’Imana.
Umunyetorero aba umuhanzi wigenga abanje kubisaba no kwandikira Umuyobozi w’Itorero abarizwamo, kandi mu mico ye agomba kwirinda imyambarire idakwiye no kugendera ku ndangagaciro za kirokore.
Amabwiriza mashya kandi ashimangira ko korali cyangwa umuhanzi wo muri ADEPR watumiwe mu yandi matorero cyangwa hanze y’Igihugu, bimenyeshwa Umushumba Mukuru wa ADEPR n’Umushumba w’Ururembo mu nyandiko.
ADEPR kandi yongeye kwibutsa abahanzi n’amakorali ko kunyuranya n’amahame abagenga bibaviramo ibihano biva ku kugawa kugeza ku guseswa burundu.
Korali cyangwa itsinda riramya riseswa iyo abarigize batagikurikiza imyizerere shingiro, icyerekezo n’indangagaciro bya ADEPR cyangwa barigometse ku itorero no kwanga kwisubiraho.
Ku rundi ruhande, umuririmbyi wakoze ibyaha n’amakosa akomeye ahanishwa guhagarikwa ibyumweru bibiri, ukwezi, amezi atatu no gusezererwa burundu muri korali cyangwa mu itsinda ryo kuramya no guhimbaza Imana.
Like This Post? Related Posts
