Yanditswe na: NSENGIYUMVA J Damascene
27/11/2025 16:48
Minisitiri w’Uburezi, Nsengimana Joseph, yagaragaje ko kwimakaza uburezi budaheza atari gahunda ishingiye ku bufasha cyangwa impuhwe, ahubwo ari igisubizo kirambye ku iterambere ry’ubukungu bw’igihugu.
Ibi yabivugiye mu Nama y’Igihugu ku
burezi budaheza, aho yibukije ko abana bafite ubumuga ari “ibikoresho
by’ingenzi by’ahazaza h’u Rwanda" bityo kubaha uburezi bufite ireme ari ishoramari ryunganira ubukungu, umusaruro
n’iterambere ry'abaturage.
Mu rwego rwo gushyira mu
bikorwa iyi ntego, Leta yatangiye kubaka amashuri y’icyitegererezo mu Ntara
zose n’Umujyi wa Kigali. Ayo mashuri azajya atanga serivisi zihariye zifasha
abana bafite ubumuga kwiga neza no kuzamura impano zabo, ibintu bizatuma bava
mu cyiciro cy’abaterwa igihombo n’imibereho, ahubwo bakinjira mu cyiciro
cy’abafasha igihugu mu bukungu.
Minisitiri Nsengimana
yagaragaje ko mu gihe abantu bafite ubumuga bagihura n’imbogamizi mu burezi,
igihugu gihomba amasoko
y’imigabane y’umurimo, impano n’udushya twagakwiye kubaka
ubukungu bushingiye ku bumenyi. Ati: “Ntidushobora gutakaza ubushobozi bw’abana b’u
Rwanda; kubigisha ni ugushora mu hazaza.”
Inzego zishinzwe uburezi,
sosiyete sivile n’ababyeyi barushijeho kwibutswa ko imbogamizi zikigaragara nko kubura abarimu bazi
ururimi rw’amarenga, ibikoresho bidahagije ndetse n’imyumvire y’ababyeyi bituma igihugu kitabona
umusaruro wose gishobora gukura muri uru rubyiruko.
Abashakashatsi bo muri
NCPD bagaragaje ko abantu bafite ubumuga bize babasha kubona akazi
ku kigero cya 25,8%, mu gihe abandi benshi badafite ubushobozi
bwo gupigana ku isoko ry’umurimo kubera kutabona uburezi bukwiye. Ibi basanga
ari igihombo kinini ku bukungu bw’igihugu, bityo hakenewe amashuri ahagije ya
Leta atomora ibiciro, akagera kuri benshi kandi akita ku byangombwa byihariye.
Umwarimu Bizeyimana Justin
na bamwe mu banyeshuri barimo Simuruna Bertha bagaragaje ko iterambere rimaze
kugerwaho ari ingenzi, ariko ko hakiri icyuho gikomeye mu bikoresho no mu
bumenyi bw’abarimu. Gusa ibyo na byo ni “amahirwe yo gushora imbere”, kuko gushyiramo
imbaraga muri ibi bikorwa bizafasha u Rwanda kubona urubyiruko rufite ubumenyi
bwagutse, rushobora guhanga imirimo no gukurura ishoramari.
Imibare yavuye mu bushakashatsi bw’Inama
y’Igihugu y’Abantu bafite Ubumuga (NCPD) muri Kamena 2025, yagaragaje ko muri
rusange abafite ubumuga mu Rwanda basaga 145 362 bangana na 25,8% bafite akazi
kubera ko bize.
Ni mu gihe abasaga ibihumbi 317 360 bangana na 56,4% barimo abize n’abatize, nta kazi bafite. Abasaga ibihumbi 99 462 bangana na 17,7%, nta makuru yabo ahagije yamenyekanye.
