• Kurwana n'ababandi bari mu nsengero na byo nta mpuhwe mbifitiye - Perezida Kagame

Perezida wa Repubulika y’u Rwanda yakuriye inzira ku murima abifuza ko insengero zuzuje ibisabwa zafungurwa ashimangira ko ku bwe nta rusengero na rumwe yafungura ko ahubwo n’izitarafunzwe ku bwe zakabaye zarafunzwe.

Ni ibitekerezo umukuru w’Igihugu yatangiye mu kiganiro n’abanyamakuru kuri uyu wa 27 Ugushingo 2025 aho yagaragaje ko insengero zasigaye zidafunzwe nazo zakabaye zifunze, ku bwe umukuru w’igihugu yemeza ko Insengero atari ikintu gihangayikishije ukurikije ibibazo byugarije u Rwanda n’umugabane w’Afurika muri rusange.

Ati “Iyo biba njyewe nta rusengero na rumwe nafungura, muri ibyo byose twavugaga by’intambara ziri ku isi n’imibereho y’Igihugu, insengero zifitemo ruhare ki ? Abenshi bari mu manyanga (cheating), ariko muba hehe mwebwe? Njyewe ibyo mbona huzuyemo ububandi gusa.”

Akomeza agira ati “ Kurwana n’ababandi bari mu nsengero na byo nta mpuhwe mbifitiye na busa. Rwose. Ariko mwebwe abakoroni barabarindagije namwe murarindagira, ubu twirirwe tuganira ibintu by’insengero? Mujye guhinga mworore, gusenga n’ushaka usengere kuri telefone. Insengero ni iz’iki? Aho byaturutse ntuhazi?”

Si ubwa mbere umukuru w’igihugu agaragaje ko ku bwe nta mpamvu yo gufungura insengero zafunzwe kuko no muri kanama 2024 ubwo yakiraga indahiro z’abadepite yavuze ko ifungwa ry’insengero ari icyemezo azi ndetse ashyigikiye bijyanye no kwamagana ubujura abitwa abahanuzi bazikoreragamo.

Icyo gihe yagize ati ““Imbaraga twari dukwiye kuba dukoresha mu gukemura ibibazo bya buri munsi bitureba, biduha umutekano, bituzamurira ubukungu, bituma Umunyarwanda atagira inzara, biriya bibazo navugaga, zose mugiye kuzimarira mu bintu…”

Ati “Ni byo mushaka kubamo? Ubu muri aha, muhagarariye abaturage, barabatoye, mwarangiza, ni ibyo murimo? Niba mushaka kuba abapasiteri, muve mu budepite, mube abapasiteri. Ariko nabwo, mbere y’uko muba abapasiteri, ibyo bindi mujyamo, ibyo gushuka abantu mukabahanurira, wabanje ukihanurira, ukamenya ibyo uzaba! Biragenda bikagera no muri politiki, ni nko kuyobya abantu, bakajya mu bwonko bwawe, bagahindura uko ugomba gutekereza, uko ugomba gukora buri kintu.”

Mu mwaka wa 2024 nibwo Urwego rw’Igihugu rw’imiyoborere (RGB) rwatangije ubugenzuzi bwo gufunga insengero zitujuje ibisabwa, ni ubugenzizi bwasize “Minisiteri y’Ubutegetsi bw’Igihugu itangaje ko insengero 14.093 zagenzuwe mu gihugu hose, 9.880 zafunzwe by’agateganyo kubera ko zitujuje ibisabwa.

Icyo gihe iyo minisiteri yasobanuye ko nyuma y’ubu bugenzuzi, byagaragaye ko insengero zirenga 300 zigomba gusenywa bitewe n’uko zubatse mu buryo bwashyira abazisengeramo mu kaga, imiryango 47 ishingiye ku madini yamburwa uburenganzira bwo gukora.

Icyakora kugeza ubu zimwe muri izo nsengero zivuga ko zujuje ibyo zasabwaga ariko zigategereza gukomorerwa kongera gukora amaso agahera mu kirere.

Like This Post?

• Share On:

Related Posts

---