• Guinée-Bissau: Gen N’Tam yarahiriye kuyobora igihugu nyuma ya coup d’etat

Gen Horta N’Tam yagizwe Perezida w’inzibacyuho wa Guinée-Bissau nyuma y’aho habaye Umaro Sissoco Embaló akuwe ku butegetsi ku wa 26 Ugushyingo 2025.

Ku gicamunsi cyo ku wa 26 Ugushyingo, Umaro yagiranye n’ibinyamakuru ikiganiro kuri telefone, abimenyesha ko yakuwe ku butegetsi n’abasirikare bayobowe n’Umugaba w’ingabo zirwanira ku butaka, Brig Gen Denis N’Canha, banamuta muri yombi.

Nyuma Brig Gen N’Canha yagaragaye kuri televiziyo y’igihugu, amenyesha abaturage ko Inama Nkuru y’Igisirikare ari yo izakomeza kuyobora iki gihugu kugeza hagiyeho ubundi buyobozi.

Kuri uyu wa 27 Ugushyingo, Gen N’Tam yarahiriye kuyobora Inama Nkuru y’Igisirikare no kuyobora igihugu by’agateganyo mu gihe cy’umwaka umwe. Ni umuhango wabereye mu cyumba cy’inama cyo ku cyicaro cy’igisirikare.

Radiyo mpuzamahanga y’Abafaransa, RFI, yatangaje ko Umaro agifungiwe ku Cyicaro cy’Ingabo za Guinée-Bissau, kandi ko abakuru b’ibihugu byo mu karere bari gukora ibishoboka kugira ngo ajyanwe ahantu heza.

Umuryango w’Ibihugu byo mu Karere ka Afurika y’Uburengerazuba, CEDEAO, n’umuryango wa Afurika Yunze Ubumwe (AU) yamaganye coup détat yakorewe Umaro, ishimangira ko ari igikorwa kinyuranyije n’amategeko.

Iyi coup détat yabayeho nyuma y’iminsi itatu habaye amatora y’Umukuru w’Igihugu, aho Umaro yemezaga ko yayatsinze ku majwi 65%. Komisiyo y’igihugu y’amatora yateganyaga gutangaza ibyavuyemo kuri uyu wa 27 Ugushyingo.

Like This Post?

• Share On:

Related Posts

---