• Perezida Kagame yavuze ku guhindagurika ku ijambo kwa DRC

“Bemerera ibintu i Washington cyangwa no muri Doha rimwe na rimwe biba biri no ku karubanda, nyuma y’umunsi umwe cyangwa icyumweru ukumva umwe aravuze ngo oya ibi ntituzabikora, kugeza hari ibindi bikozwe.”

Ni ibyagarutsweho na Perezida Paul Kagame, mu kiganiro n’Itangazamakuru kuri uyu wa 27 Ugushyingo 2025, ubwo yagarukaga ku biganiro n’amasezerano y’amahoro na Repubulika ya Demokarasi ya Congo, (DRC) aho icyo gihugu kitajya gihagarara ku ijambo cyavuze ahubwo kigahora cyivuguruza ku byo kiba cyemereye ku karubanda.

Perezida Kagame yagaragaje ko ibyo atari bishya mu matwi y’abantu kandi bigaragarira buri umwe aho ibihugu byombi byemeranya ku ngingo runaka ariko DRC igakora ibitandukanye.

Yagize ati: “Mumaze kumenyera izi nkuru aho abantu bavuga ibi ariko bagakora ibitandukanye. Uko ni ko ikibazo dufite na DRC giteye, icyiza ni uko bibera ku karubanda, nta byinshi byo kubigaho bibaye bikorerwa mu bwiru byacanga abantu bakagira ngo hari ibindi.”

Perezida Kagame yongeyeho ko ibyo bahora bivuguruzamo ari ibintu biba byarashyizwe ku meza y’ibiganiro ariko ari ikibazo gikomeye kuba abantu bemera ibintu ntibabikore.

Yongeyeho ati: “Waba wemeranya n’ubwenge bwawe cyangwa utabyumva icyo uba waremeye  ni ikiba cyaragusohotsemo kiba kibitswe.”

Mu biganiro bitandukanye Perezida Kagame yagiye agaragaza igituma ibibazo byo mu Burasirazuba bwa DRC bidakemuka bigirwamo uruhare n’ubuyobozi bwa Perezida, Antoine Felix Tshisekedi Chilombo uhora uhindagurika mu byo avuga.

Ibyo bikaba bikoma mu nkokora ishyira mu bikorwa ry’amasezerano y’amahoro n’ingingo zitandukanye ziba zemeranyijweho.

Perezida Antoine Felix Tshisekedi ashinja u Rwanda gushyigikira umutwe w’Abakongomani wa AFC/M23, uharanira uburenganzira bwawo, mu gihe u Rwanda narwo rushinja DRC kuba indiri y’umutwe wa FDLR, washinzwe n’abasize bakoze Jenoside yakorewe Abatutsi mu 1994.

U Rwanda rwagaragaje kenshi ko uwo mutwe wagiye uhungabanya umutekano w’u Rwanda ukarutera uturutse muri icyo gihugu abantu bakahasiga ubuzima n’ibikorwa remezo bikangirika, rukavuga ko icyo rwakoze ari ingamba z’ubwirinzi ntaho ruhuriye n’umutwe wa AFC/M23.

Ubwo yagarukaga ku bibazo bya DRC Perezida Kagame yavuze ko icyo gihugu cyakunze kwihunza ibibazo byacyo kikabyegeka ku Rwanda ari nako kidahwema guhora gisabira u Rwanda ibihano mu bihugu by’amahanga, kandi byagaragaraga ko abayobozi bayo batitaye ku bibazo by’abenegihugu, bakihunza n’ishingano.

Perezida Kagame yavuze ko gusabira u Rwanda ibihano batari gukemura ibyo bibazo cyangwa ngo bigire icyo bitanga mu gihe abantu badashaka kubona ibintu uko biri.

Yagize ati: “None se guhana u Rwanda ni gute byari gukemura ibibazo byawe? Ni gute byari gukemura ibibazo by’abenegihugu bamaze igihe baharanira uburenganzira bwabo? Ni gute byari gukemura ibibazo by’abacanshuro mwazanye ngo babarwanirire?”

Icyakora yagaragaje ko hari icyizere ko ibibazo by’umutekano muke bigaragara mu Burasirazuba bwa Repubulika ya Demokarasi ya Congo bishobora gukemuka, avuga ko hari intambwe nziza imaze guterwa iganisha ku bisubizo birambye.

Perezida Kagame yavuze ko yiteguye kugerageza uburyo bwose bushoboka ngo ibibazo bikemuke kandi hari amahirwe ariko anagaragaza ko ibyo bitamubuza kwita ku byo agomba kwitaho.

Yanashimiye umuhate n’uruhare rwa Leta Zunze Ubumwe za Amerika n’Ubuyobozi bwa Perezida Donald Trump.

Like This Post?

• Share On:

Related Posts

---