Yanditswe na: NDAYISENGA Clement
28/11/2025 10:16
Ubushinjacyaha ku Rwego Rwisumbuye rwa Musanze bukurikirinye umugabo uri mu kigero cy’imyaka 24 y'amavuko ukekwaho gutwika abantu batandukanye akoresheje lisansi, batatu muri bo bakahasiga ubuzima.
Icyaha akekwaho cyakozwe ku itariki ya 13 Ukwakira 2025 ndetse na 13 Ugushyingo 2025, mu masaha atandukanye y’ijoro mu Mudugudu wa Nyagisozi, Kagari ka Gatwa, mu Murenge wa Janja, mu Karere ka Gakenke, mu Ntara y'Amajyaruguru.
Ukurikiranywe, ku itariki ya 13 Ukwakira 2025, yafashe utujerekani tubiri turimo buri kamwe litiro ya lisansi ajya mu rugo rw’umukecuru baturanye w’imyaka 73 y'amavuko, agezeyo yasanze umukecuru ari mu gikoni, amena lisansi mu muriro igikoni gifatwa n’inkongi y’umuriro.
Abaturage baratabaye, basanga umukecuru n’umwuzukuru we w’imyaka 10 y'amavuko bahiye bikabije babagejeje ku bitaro bya Gatonde bahita bapfa, naho undi mwana bari kumwe w'imyaka 14 y'amavuko akomereka bikabije.
Uregwa na none ku itariki ya 13 Ugushyingo 2025, yagiye mu rundi rugo rw’umusaza w’imyaka 72 y'amavuko, akaba ari na se wabo, asanga baryamye, amena ikirahuri cy’idirishya abamenaho lisansi ubundi abarasiraho ikibiriti barashya. Umusaza yagejejwe mu bitaro ahita apfa naho umukecuru bari kumwe n’ubu aracyarwaye.
Mu ibazwa rye, uregwa yemeye icyaha, asobanura ko icyamuteye gukora icyaha ari uko uwo mukecuru n’uyu musaza bajyaga bamuroga ndetse bakanamwoherereza n’imyuka mibi ngo bashaka ko ntacyo azageraho.
Icyo amategeko ateganya ku cyaha akurikiranyweho
Icyaha uregwa akurikiranyweho giteganywa kandi kigahanishwa ingingo ya 107 y’ Itegeko No 68/2018 ryo ku wa 30/08/20218 rigena ibyaha n’ibihano muri rusange. Nikimuhama azahanishwa igihano cy’igifungo cya burundu.
Like This Post? Related Posts
