• Umukobwa wa Perezida yeguye ku Budepite nyuma yo gushinjwa gucuruza urubyiruko mu Burusiya

Duduzile Zuma-Sambudla, umukobwa wa Jacob Zuma wayoboye Afurika y’Epfo, yeguye ku mwanya w’Ubudepite nyuma y’amakuru akomeje kuvuga ko yagize uruhare mu kubeshya no kohereza Abanyafurika y’Epfo 17 mu Burusiya, aho bahatiwe kujya kurwana mu Ntambara ya Ukraine nk’abacanshuro batabizi.

Zuma-Sambudla, wari uhagarariye ishyaka rya Se, uMkhonto weSizwe (MK) mu Nteko Ishingamategeko, yahakanye ibyo birego byose ashinjwa.

Mu nyandiko yatanze mu bugenzacyaha avuga ko yizeraga ko abo basore “bagiye mu mahugurwa yemewe n’amategeko.”

Yagize ati:"Ntabwo nari nshinzwe kubashakira abarwanyi, nta nubwo nari ubuhagarariye Cyangwa ubafasha muri ibyo bikorwa bitemewe."

Umwe muri aba basore, waganiriye na BBC yavuze ko babajwe n’ubuzima barimo.

Ati:"Ibintu ubona muri sinema twe tubibona mu buzima bwacu bw’ukuri."

Yavuze ko yatoranyijwe n’abantu babiri barimo na Zuma-Sambudla. Ati:"Bitanze no kugura amatike y’indege ngo tuze hano mu Burusiya."

Uyu musore yavuze ko yizeraga ko agiye kwiga ibijyanye n’uburinzi bw’abayobozi. Akigera mu Burusiya, ngo bahawe amasezerano yanditse mu rurimi badasobanukiwe. Nyuma boherejwe muri Ukraine aho batandukanyijwe; we yoherezwa mu Donetsk.

Mugenzi we, Xolani wahaye amakuru BBC, yavuze ko umuvandimwe we “ari mu bwoba bw’igihe kizaza kuko baba bari ahantu hari intambara.” Avuga ko kwegura kwa Zuma-Sambudla “ntacyo bivuze ku miryango.”

Duduzile Zuma wari usanzwe ari Umudepite mu Nteko Ishinga Amategeko ya Afurika y’Epfo ni umwe mu bana ba Jacob Zuma wayoboye Afurika y’Epfo kuva mu 2009 kugeza mu 2018.

Iperereza ari gukorwaho ryasabwe n’umuvandimwe we kuri se witwa Zuma-Mncube wabimenyesheje Polisi ya Afurika y’Epfo.

Mncube yabwiye Polisi ko bishoboka ko Duduzile yagize uruhare mu kohereza abo Banyafurika y’Epfo mu Burusiya nk’abacanshuro ariko akabikora bo batazi ikibajyanyeyo, bakaza kwisanga ku rugamba muri Ukraine.

Mu ntangiriro z’uku kwezi k’Ugushyingo ni bwo Guverinoma ya Afurika y’Epfo yatangaje ko igomba kumenya uko abagabo 17 bo muri icyo gihugu bari hagati y’imyaka 20 na 39 bisanze barwanira u Burusiya nk’abacanshuro.

Ni nyuma y’uko abo bagabo bari basabye ubufasha Guverinoma ya Afurika y’Epfo bwo kubasubiza iwabo, bavuga ko baguye mu mutego wo kujyanwa batazi ko bagiye kurwanira u Burusiya.

Like This Post?

• Share On:

Related Posts

---