Yanditswe na: NDAYISENGA Clement
30/11/2025 07:08
Umunyamabanga wa Leta muri Minisiteri y’Ibikorwa Remezo (MININFRA), Uwihanganye Jean de Dieu, yatangaje ko guhera mu Cyumweru gitaha ku byapa bitegerwamo bisi mu Mujyi wa Kigali hatangira gushyirwa ingengabihe igaragaza igihe zihanyurira, nyuma hakazashyirwaho uburyo bwo kuzitega hakoreshejwe telefone.
Uwihanganye yavuze ko ubwo buryo bugamije gufasha abantu kugenda muri bisi, kandi bugomba kuba ubwo abantu bose bahitamo kandi bwizewe.
Ni gahunda yemejwe n’Inama y’Abaminisitiri yateranye ku wa Gatanu, tariki ya 28 Ugushyingo 2025.
Uwihanganye yongeyeho ko umwihariko w’iyi gahunda yo gutwara abagenzi mu buryo bwa rusange nshya harimo kuba busi zizajya zigendera ku ngengabihe izwi.
Yagize ati:"Zizajya zihaguruka kandi zigere aho zijya ku buryo bwateganyijwe kandi zigomba kubahiriza. Ibyapa byose bya bisi bizaba biriho iyo ngengabihe, yaba imanitse, ndetse hari n’ibyapa by’ikoranabuhanga aho ushobora kubona aho bisi igana n’igihe igiye kukugereraho."
Yakomeje avuga ko harimo gutegurwa uburyo bwo kureba busi umuntu yifuza gutega aho igeze akoresheje telefone kandi yizeza ko nta bisi izongera gutinda ishyiramo abantu kugira ngo yuzuze.
Yagize ati:"Ubu buryo bwo buzakomeza kubakwa mu gihe cy’ukwezi kumwe ni bwo tuzaba twizeye ko bukora neza. Ntabwo zemerewe kurenza iminota 10 kuri za gare cyangwa itatu ku byapa, ibyo byose wongeyeho ko n’iyo zigeze ku matara yo ku mihanda (feux rouge) zigomba guhabwa inzira mbere y’izindi modoka, mbese bizatuma busi zigendera ku gihe."
Uwihanganye yavuze ko Leta yifuza ko abantu bahitamo kugenda mu modoka za bisi kurusha kugenda mu zabo bwite, cyangwa ubundi buryo bwo kugenda mu mujyi w Kigali.
Ku ikubitiro ubwo buryo bwatangiriye mu mujyi wa Kigali rwagati ahazwi nka Downtown ku modoka zijya I Remeza zinyuze Sonatube.
MININFRA ivuga ko ubu kuri uwo muhanda hamaze gushyirwaho amatara yemerera bisi gutambuka mbere y’izindi kugira ngo zihabwe umwanya bityo n’abatega bazitege ku bwinshi.
Uwihanganye yavuze ko ubu uburyo bushya buzatuma intego u Rwanda rwihaye yo kuba mu mpera za 2026 busi zose zitwara abagenzi mu buryo bwa rusange zizaba zikoresha amashanyarazi mu rwego rwo kurengera ibidukikije.
Yagize ati:"Leta y’u Rwanda yashyizeho ikigo ECOfleet kigamije kureba ko ibyo bintu bikurikirikizwa gikorana n’abikorera kandi bakorera ku ntego. Icyo kigo kizajya gikorana n’abikorera basinyane amasezerano yo gutwara no kuzikora igihe zagize ikibazo."
Yakomeje avuga ko ibiciro byo gutega bisi rusange bizakomeza uko byari biri, kugira ngo abantu babanze bizere ubwo buryo bushya.
Ni gahunda izatangira kubahirizwa ku wa Kabiri, tariki ya 02 Ukuboza 2025, aho izahera mu Mujyi wa Kigali ariko bikaba bitaganyijwe ko izakomereza no mu yindi Mijyi y’u Rwanda.
Minisitiri w’Ibudukikije, Dr Arakwiye Bernadette, yavuze ko ubwo buryo bugiye gufasha mu kubungabunga ibidukikije binyuze mu kugabanya ibinyabiziga byangiza umwuka abantu bahumeka.
Ati:"Ibinyabiziga cyane cyane ibidafashwe neza, ibidakoresha amashanyarazi, bigira uruhare mu guhumanya ikirere no kwangiza ibidukikije."
Iyi Minisiteri itangaza ko Leta y’u Rwanda yiyemeje kugabanya imyuka ihumanya ikirere ku rugero rwa 53% bitarenze mu 2035, aho uburyo bwo gutwara abantu n’ibintu n’ibindi bikorwa by’ingufu byitezweho kugira uruhare rwa 50% mu kuyigeraho.
Like This Post? Related Posts
