Yanditswe na: NDAYISENGA Clement
30/11/2025 08:22
Polisi y’u Rwanda ifatanyijwe n’Urwego rw’Igihugu rw'Ubugenzacyaha (RIB), yataye muri yombi Umunyamabanga Nshingwabikorwa w’Umurenge wa Mamba, mu Karere ka Gisagara, mu Ntara y'Amajyepfo n’abandi bantu batatu bakurikiranweho icya cya ruswa.
Abo batawe muri yombi ku wa wa 27 Ugushyingo 2025, aho abantu bane barimo abaturage batatu n’Umunyamabanga Nshingwabikorwa w’Umurenge wa Mamba, bafashwe bakekwaho icyaha cya ruswa.
Amakuru avuga ko uwo muyobozi yafatiwe mu cyuho yakira ruswa y’ibihumbi magana abiri (200,000Frw) yari ahawe n’umuturage wengaga inzoga zitemewe, bigizwemo uruhare n’inzego z’umutekano ku bufatanye n’umuturage watanze amakuru, bivugwa ko ngo yari yaramuzengereje amwaka ruswa.
Umuvugizi wa Polisi mu Ntara y’Amajyepfo, CIP Kamanzi Hassan, yemeje aya makuru.
Yagize ati:"Bakekwaho icyaha cya ruswa, ubu tuvugana bafungiye kuri Polisi, Sitasiyo ya Ndora, mu gihe RIB yatangiye iperereza."
Icyaha cyo Gusaba, kwakira cyangwa gutanga indonke giteganwa n’ingingo ya Kane y’itegeko N°54/2018 ryo ku wa 13/08/2018 ryerekeye kurwanya ruswa.
Ingingo yaryo ya 4 ivuga ko ugihamijwe n'urukiko ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.
Like This Post? Related Posts
