• Madamu Jeannette Kagame yibukije ba ‘Mutima w’urugo’ kuba umusemburo w’impinduka mu mitekerereze

Nyakubahwa Madamu Jeannette Kagame yasabye urugaga rw’abagore rushamikiye ku muryango FPR Inkotanyi guharanira ubuzima bwiza, gukunda no guharanira kwimana u Rwanda.

Ni ubutumwa yahaye abarenga 2000 bitabiriye Inama Nkuru ya Gatandatu y’Urugaga rw’Abagore rushamikiye ku muryango FPR Inkotanyi kuri uyu wa Gatandatu.

Madamu Jeannette Kagame yabibukije ko Isi iri guca mu bihe by’umutekano muke, bityo bakwiye kwiga uko babicamo neza.

Yavuze ko u Rwanda rukomeje gutera imbere no kubaka ibigwi ku ruhando mpuzamahanga, bityo abagore bakwiye kugira uruhare muri iyo ntambwe idahinduka.

Ati: “Ibi biradusaba kongera gutekereza ku ruhare rwacu nka ba ‘Mutima w’urugo’, mu kubaka umuryango uhamye, kuko iterambere ry’Igihugu ritangirira mu muryango, kandi umugore akaba inkingi ikomeye yubaka kandi ikomeza uwo muryango.”

Yakomeje ati: “Amahitamo ubuyobozi bw’Igihugu bwakoze yibutsa ko Abanyarwanda bafitanye isano y’Ubunyarwanda, bityo abagore basabwa gufata iya mbere mu gushimangira iyo ntero bahereye mu miryango yabo.”

Madamu Jeannette Kagame yavuze ko bakwiye guharanira kwimana u Rwanda no kurukunda.

Ati “Nk’abagize Urugaga rw’Abagore, dukomeze kuba umusemburo w’impinduka mu mitekerereze, mu myumvire n’imikorere bigamije kwihutisha iterambere ry’imibereho myiza n’ubukungu.

Gukunda no kwimana u Rwanda bikomeze kuba imibereho yacu ya buri munsi kuko nta wundi uzabidukorera. Ntacyo Igihugu kitaduhaye. Dufite amategeko aturengera n’ubuyobozi bw’Igihugu buzirikana agaciro k’umugore. Ahasigaye ni ahacu.”

Yabasabye kandi gushyira imbere Ubunyarwanda.

Ati “Ubunyarwanda ntabwo ari ijambo gusa rivuga iryo sano; ni intekerezo, imyitwarire n’imibanire bishingiye ku ndangagaciro z’umuco wacu n’ururimi rwacu. Ubunyarwanda buravukanwa ariko cyane cyane buratozwa. Aha ni naho dufite inshingano zikomeye nk’ababyeyi bahekeye u Rwanda.”

Madamu Jeannette Kagame yibukije abagore ko uburere buruta ubuvuke, bityo iterambere ry’Igihugu ridashoboka mu gihe umuryango udatekanye cyangwa udateye imbere.

Yongeyeho ko mu gihe Ikoranabuhanga ku Isi rikataje, bakwiye kuzirikana no kwihatira kujyana na ryo.

Ati “Ibihe turimo by’iterambere ryihuta muri byose cyane mu ikoranabuhanga, bituma hari imiryango imwe n’imwe igaragara nk’itagifite ubushobozi bwo kubaka ubusabane hagati y’abana n’ababyeyi.”

Madamu Jeannette Kagame yasabye abanyamuryango bibumbiye mu Rugaga rw’Abagore rushamikiye ku Muryango FPR Inkotanyi, gukomeza gukora iyo bwabaga, baba umusemburo w’impinduka nziza u Rwanda rwifuza.

Like This Post?

• Share On:

Related Posts

---