Yanditswe na: NSENGIYUMVA J Damascene
13/12/2025 00:11
Abacungagereza 42 barimo Abanyarwanda batanu barangije amasomo ajyanye n’imiyoborere n’iterambere mu by’igorora (Senior Management Development Course in Corrections [SMDCC]) bize mu gihe cy’umwa, ni ukuvuga ko batangiye muri Mutarama 2025.
Umuhango wo gusoza
amasomo wabaye ku wa 12 Ukuboza 2025. Witabiriwe n’Umunyamabanga wa mbere muri
Ambasade y’u Rwanda muri Zimbabwe, Nikuze Nkusi Euphrasie, Minisitiri
w’Ubutabera muri Zimbabwe, Ziyambi Ziyambi n’abandi bayobozi bakuru.
Abarangije amasomo ni icyiciro cya gatatu ariko ku ruhande
rw’Urwego rw’u Rwanda rushinzwe Igorora, ni icyiciro cya kabiri gisoje amasomo
kuri uru rwego.
Bose uko ari 42 bahawe impeta z’abayobozi bakuru mu by’igorora,
Diploma mu byerekeye Entrepreneurship and Management bahawe na Zimbabwe Open
University, certificat mu byerekeye imicungire y’amagororero bahawe n’Ishuri
Rikuru ryigisha ibijyanye n’Igorora [Zimbabwe Prisons and Correctional Service
Staff College].
Iki gikorwa gishingiye kuri gahunda ya RCS igamije kurushaho
kunoza imikorere, gusangira ubumenyi n’amahugurwa binyuze mu bufatanye
mpuzamahanga.
Mu masomo bize harimo politiki n’imiyoborere by’igorora,
igenamigambi riboneye, guhangana n’ibibazo bitunguranye, uburenganzira bwa
muntu n’imiyoborere yubahiriza amahame ngengamyitwarire, n’imibereho myiza
y’abakozi. Abayitabiriye kandi bungutse ubumenyi mu gukora ibibyara umusaruro,
guhanga ibishya no guhanga akazi.
Minisitiri ZIYAMBI ZIYAMBI, yavuze ko ubuyobozi bukora neza
iby’igorora bwibanda ku gusigasira umutekano, guharanira igororamuco no gufata
abafunzwe nk’abantu.
Yashimangiye ko hakwiye hushyirwa imbaraga mu gufungura
by’agateganyo abantu bakajya kurangiriza ibihano muri sosiyete, no gukoresha
ikoranabuhanga hagamijwe kwihutisha impinduka.
