Yanditswe na: NSENGIYUMVA J Damascene
26/12/2025 13:34
Ingabo za Repubulika Iharanira Demokarasi ya Congo kuri uyu wa Gatanu tariki ya 26 Ukuboza, zarashe amato abiri y’inyeshyamba zo mu mutwe wa AFC/M23.
Ubwo bwato bwarasiwe ku cyambu
cya Kulundu giherereye ku kiyaga cya Tanganyika, mu gace ka Makobola ko muri
Teritwari ya Fizi mu ntara ya Kivu y’Amajyepfo.
Drone ya FARDC ni yo
yarashe ubwo bwato, ndetse amakuru avuga ko abasirikare bose bari baburimo
bitabye Imana.
Usibye kuba AFC/M23
yarasiwe ubwato, amakuru avuga ko ejo ku wa Kane nimugoroba Ingabo zayo zari
ziri muri Makobola zahavuye bikarangira FARDC na Wazalendo binjiye muri aka
gace, nyuma y’imirwano yabereye ku misozi ya Kasekezi, Bangwe, Ngalula na
Makobola ikikije uriya mujyi muto uri hagati ya Teritwari za Fizi na Uvira.
Andi makuru avuga ko kuri uyu wa Gatanu imirwano ikomeye yongeye kubura hagati y’inyeshyamba n’Ingabo zirwana ku ruhande rwa Leta ya RDC, mu gace ka Katongo no mu nkengero z’uduce twa Kigongo na Kabimba duherereye mu bilometero bibarirwa mu munani uvuye ku cyambu cya Uvira.
