Yanditswe na: NDAYISENGA Clement
09/01/2026 17:07
Polisi ya Tanzania yatangaje ko Umunyarwandakazi witwa Uwumuhoza Viollete yaguye muri kasho y’aho yari afungiwe mu majyaruguru y’Umujyi wa Arusha.
Itangazo Polisi ya Tanzania yashyize hanze ku wa Kane, tariki ya 08 Mutarama 2026, yavuze ko urupfu rwe rwabaye nk’amayobera kuko hataramenyekana icyaruteye.
Polisi ya Tanzania yerekanye ko iperereza rikomeje kugira ngo hamenyekane icyabaye intandaro y’urwo rupfu rwa nyakwigendera rwabaye ku wa 07 Mutarama 2026.
Ku rundi ruhande ariko raporo yaturutse ku biro bikuru bya Polisi ya Tanzania muri Dodoma yavuze ko Uwumuhoza Viollete yaba yiyahuriye aho yari afungiwe nubwo na byo bigikomeje kwibazwaho.
Ntabwo Polisi ya Tanzania yigeze itangaza imyaka ya Uwamahoro Viollete. Gusa, yari yaratawe muri yombi kubera kwinjira no gutura muri Tanzania mu buryo bunyuranyije n’amategeko burimo no kuba nta cyangombwa kimwemerera kuhaba yari afite.
