• Togo : Lt Col Paul Henri Damiba yatawe muri yombi anirukanwa mu gihugu

Lt  Col Paul Henri Damiba wahoze ari Perezida w’inzibacyuho muri Burkina Faso, yatawe muri yombi mu gihugu cya Togo mbere yo kwirukanwa akoherezwa hanze y’igihugu, nk’uko byemejwe n’inzego z’umutekano n’inkuru z’abanyamakuru bo muri icyo gihugu

Lt  Col Paul Henri Damiba yayoboye Burkina Faso nyuma ya coup d’État yo mu 2022, ariko nawe yaje guhirikwa ku butegetsi mu mpera z’uwo mwaka na  Capitaine  Ibrahim Traoré .

 Nyuma yo kuva ku butegetsi, Damiba yahungiye mu bihugu byo muri Afurika y’Iburengerazuba, aho yakomeje kubaho mu buzima bwa politiki butagaragara cyane.

Nk’uko tubikesha Radiyo Mpuzamahanga y’Abafaransa  Damiba yafatiwe mu mujyi wa Lomé, aho yari yinjiye mu gihugu ku mpamvu zitatangajwe ku mugaragaro. Inzego za Togo zavuze ko yamaze igihe gito afunzwe mbere yo kwirukanwa ku butaka bwa Togo, yoherezwa mu kindi gihugu, nubwo aho yoherejwe hatatangajwe.

Abasesenguzi bavuga ko ifatwa n’iyirukanwa rye bifitanye isano n’uko ubutegetsi bushya bwa Burkina Faso bukomeje gukurikirana abantu bose bakekwaho gushaka guhungabanya ubutegetsi buriho cyangwa kugira uruhare mu bikorwa byo guhungabanya umutekano.

Leta ya Togo ntiyigeze itangaza ku mugaragaro impamvu nyakuri z’ifungwa rye, ariko bamwe bavuga ko byakozwe mu rwego rwo kubungabunga umutekano n’umubano mwiza hagati ya Togo na Burkina Faso.

Iki gikorwa kije mu gihe akarere ka Sahel gakomeje guhura n’ihungabana rya politiki n’umutekano, aho ibihugu nka Burkina Faso, Mali na Niger byagiye bihura n’ihirikwa ry’ubutegetsi, imirwano n’ibibazo by’iterabwoba.

Gusa  ku gicamunsi  cyo kuri  uyu  wa 20 Mutarama 2026 Guverinoma  ya Togo yatatangaje ko yafashe iki cyemezo hashingiwe ku masezerano y’ubufatanye mu by’ubutabera n’umutekano hagati ya Togo na Burkina Faso, agamije kurwanya impunzi z’abashinjwa ibyaha no kubahiriza amategeko mpuzamahanga.

Lt  Col Paul Henri Damiba yari amaze igihe akurikiranwa n’inzego z’umutekano, kandi ubuyobozi bwa Ouagadougou bwari bwarasabye ku mugaragaro ko asubizwayo kugira ngo abazwe ibyo akurikiranyweho.

 

 

 

Like This Post?

• Share On:

Related Posts

---