Yanditswe na: NDAYISENGA Clement
16/02/2026 12:52
Urukiko rwa Gisirikare rukorera i Nyamirambo, kuri uyu wa Mbere, tariki ya 16 Gashyantare 2026, rwasubitse urubanza ruregwamo Majoro Jean Claude Habineza (wambuwe ipeti rya Majoro) ukurikiranyweho kunyereza Miliyoni 485Frw.
Muri iyo dosiye Maj. Hanineza areganwa n'umuvandimwe we w'umusivile (Civile) Bavakure Ndekwe Felix wabaye umukinnyi w'umupira w'amaguru mu makipe atandukanye yo mu Rwanda nka Kiyovu Sports, Rayon Sports n'izindi...
Mu iburanisha, inteko iburanisha yabajije Majoro Habineza niba yiteguye kuburana, asubiza ko arwaye. Yasobanuye ko yari afite gahunda yo kujya kwa muganga uyu munsi kandi ko yari yasabye uruhushya rwo kwivuza.
Icyakora, Ubushinjacyaha bwa Gisirikare bwavuze ko nta kimenyetso na kimwe kigaragaza ko arwaye, busaba ko urubanza rwakomeza kuburanishwa.
Ku ruhande rwa Civile Ndekwe Felix, we yemeye ko yiteguye kuburana.
Abanyamategeko babiri bunganira Majoro Habineza bagaragaje inzitizi zitandukanye.
Bavuze ko Ubushinjacyaha bwatanze ikirego ku wa 11 Gashyantare 2026, Saa Tanu z’Ijoro, kandi ko gifite amapaji 30, bityo ko batari babonye umwanya uhagije wo kugisoma no kugisesengura.
Banagaragaje ko habayemo kongerwamo ibirego bishya, kandi uwo bunganira atarabasha gusoma no gusobanukirwa neza ibyo akurikiranyweho. Bavuze ko iminsi ibiri idahagije ku muntu ufunzwe ngo abe yasoma dosiye yose kandi anahabwe umwanya wo kwivuza.
Ubushinjacyaha bwo bwahakanye ko hari ibirego bishya byongewemo, buvuga ko habayemo gukosora gusa. Bwongeyeho ko gusaba gusubika urubanza ari amayeri Maj. Habineza asanzwe akoresha mu gutinza imanza, bunasaba ko inzitizi zatanzwe zitahabwa agaciro.
Abaregera indishyi bahagarariwe n’abanyamategeko batatu, basabye ko urubanza rutongera gusubikwa, kuko nabo bakeneye ubutabera bwihuse kandi buboneye.
Feritula Muhimakazi, umwe mu baregera indishyi, yabwiye urukiko ko yagujije banki Miliyoni 30Frw zo gukora ubucuruzi, ariko ubu ibikorwa bye byahagaze burundu.
Yavuze ko inzu yacururizagamo i Downtown yayitanze, atakijya mu Bushinwa nk’uko yabikoraga, ndetse bamwe mu bana be bakaba bararetse ishuri abandi bakaba babayeho mu buzima bugoye kubera igihombo batewe.
Urukiko nyuma yo kumva impande zombi, rwafashe umwanzuro wo gusubika urubanza kugira ngo Maj. Jean Claude Habineza abanze yivuze, ndetse n’abamwunganira bahabwe umwanya uhagije wo gusoma no gusesengura dosiye.
Urubanza rwimuriwe ku wa Mbere tariki ya 14 Mata 2026, Saa Tatu za mu gitondo. Urukiko rwagaragaje ko mu kwezi kwa Werurwe 2026, iminsi yose yari yarapangiwe izindi manza, ari na yo mpamvu hatanzwe itariki yo muri Mata 2026.
Urukiko rwashimangiye ko kuri iyo tariki urubanza ruzaburanishwa nta yandi mananiza.
Maj. Jean Claude Habineza na Civile Bavakure Ndekwe Felix bakurikiranyweho ibyaha birimo: gutanga sheki itazigamiwe, kwiba, gukoresha inyandiko mpimbano, kwambura hakoreshejwe uburiganya ndetse n’icyaha cy’ubuhemu.
Uru rubanza rwatangiye kuburanishwa ku wa 16 Nzeri 2025, rukaba rukomeje gutinda kubera impamvu zitandukanye zagiye zitangwa n’impande zombi.
Like This Post? Related Posts
