• Abanya-Iran baba mu mahanga bigaragambije basaba impinduka ku butegetsi

Nyuma y’uko Abanya-Iran babarirwa mu bihumbi bigaragambije kuva mu mpera za Ukuboza 2025 imbere mu gihugu, abo batuye mu mahanga na bo batangiye kwigaragambya basaba ko ubutegetsi bwa Iran buhinduka.

Abigaragambya bashinja ubutegetsi kubatoteza, ubuzima buhenze bukomeje kuzahaza abaturage ndetse no gukoresha imbaraga zirimo kwica abigaragambya mu mahoro.

Ku wa 14 Gashyantare 2026, imyigaragambyo ikomeye yabereye mu mijyi itandukanye ku Isi, yitabirwa n’Abanya-Iran baba mu mahanga babarirwa mu bihumbi. Yabereye mu mijyi irimo Munich, Los Angeles, Toronto, Tel Aviv, Lisbon, Sydney na London.

Iyi myigaragambyo yakurikiye impuruza yatanzwe na Reza Pahlavi, umuhungu w’uwahoze ari umwami wa Iran mbere y’impinduramatwara yo mu 1979. Uyu mugabo uri mu buhungiro muri Amerika yamaganye ubwicanyi n’iyicarubozo bikorerwa abigaragambya imbere mu gihugu.

Yagize ati:

“Ubutumwa bwanjye bwa mbere nabugeneye Abanya-Iran b’intwari bari mu gihugu imbere. Mumenye ko mutari mwenyine, uyu munsi Isi yose ibari inyuma muri uru rugamba.”

Yakomeje anenga ubutegetsi bwa Iran, abushinja ruswa, igitugu no gukoresha imbaraga mu gucecekesha abatavuga rumwe na bwo.

Ibitangazamakuru birimo BBC byanditse ko ubwitabire bwari hejuru cyane, cyane cyane i Munich, aho Polisi yatangaje ko abantu bagera ku 250.000 bitabiriye igikorwa cyo kumva ubutumwa bwa Reza Pahlavi.

Mu myigaragambyo, hari abagaragaje ko bashyigikiye ko Reza Pahlavi yagaruka mu buyobozi kugira ngo akemure ibibazo igihugu gifite.

Imyigaragambyo imbere muri Iran yatangiye ku wa 28 Ukuboza 2025, abaturage binubira izamuka rikabije ry’ibiciro byatewe no guta agaciro kw’ifaranga. Nyuma, iraguka ihinduka iyo gusaba impinduka ku butegetsi. Bivugwa ko abantu barenga ibihumbi 16 bamaze kugwa muri iyo myigaragambyo.

Hagati aho, United States yatangaje ko ishobora gukoresha imbaraga za gisirikare mu gufasha abaturage ba Iran gukora impinduka bashaka, nubwo yakomeje kubigendamo buhoro ugereranyije n’imvugo zabanjirijeho za Perezida Donald Trump.

Ku wa 13 Gashyantare 2026, ibiro ntaramakuru bya Reuters byatangaje ko abayobozi babiri muri Amerika batifuje gutangazwa amazina bavuze ko Igisirikare cya Amerika kiri kwitegura intambara ishobora kumara ibyumweru kuri Iran mu gihe Perezida Trump azaba atanze amabwiriza.

Like This Post?

• Share On:

Related Posts

---