• Kenya: Minisitiri w’Ububanyi n’Amahanga wa Misiri yagiriye uruzinduko i Nairobi

Minisitiri w’Intebe wa Kenya, Musalia Mudavadi, ku wa mbere i Nairobi yakiriye Minisitiri w’Ububanyi n’Amahanga wa Misiri, Badr Abdelatty, mu ruzinduko rugamije gushimangira umubano hagati y’ibihugu byombi.

Uru ruzinduko rugaragaza ubushake bwa Kenya na Misiri bwo kongera imbaraga mu bucuruzi no mu ishoramari. Muri urwo rugendo hateganyijwe kuzabera ibiganiro byimbitse bigamije guteza imbere ubufatanye mu by’ubukungu no kwagura isoko hagati y’impande zombi.

Mu ijambo rye, Musalia Mudavadi yavuze ko Kenya ikomeje gushyigikira uburyo bwubakiye ku biganiro no ku miyoborere iyobowe n’Abanyafurika mu gukemura ibibazo birebana n’uruzi rwa Nil, binyuze mu Initiative du bassin du Nil (NBI).

Yagize ati:“Dukomeje gushyigikira uburyo bushingiye ku biganiro, burimo impande zose kandi buyobowe n’Abanyafurika binyuze mu NBI.

 Kenya yemera kandi ishyigikiye umwanya wa Misiri watangarijwe mu nama ya 33 y’Abaminisitiri b’ibihugu bya Nil yabereye i Bujumbura muri Ukuboza 2025, isaba ibiganiro, ubufatanye n’icyubahiro hagati y’ibihugu. Twiteguye kuba umuhuza utabogamye mu guteza imbere imiyoborere ihuriweho kandi irambye y’uruzi rwa Nil.”

Abayobozi bombi banashimangiye akamaro ko guteza imbere ubufatanye n’abikorera no gutandukanya ibicuruzwa byoherezwa ku masoko, ndetse no kwihutisha ishyirwaho ry’Inama y’Ubucuruzi ihuriweho ya Kenya na Misiri, mu rwego rwo kugera ku iterambere risangiwe.

Uru ruzinduko rufatwa nk’intambwe nshya mu gushimangira umubano wa dipolomasi n’ubukungu hagati ya Kenya na Misiri, cyane cyane ku bijyanye n’imicungire y’umutungo w’amazi ya Nil n’ubufatanye mu karere.

 

Like This Post?

• Share On:

Related Posts

---