• Ingabo za RDF na UPDF zikorera hafi y’imipaka zahuriye mu nama i Musanze

Ingabo z’u Rwanda (RDF) n’Ingabo za Uganda (UPDF) bateraniye mu nama ya karindwi y’Abayobozi bakorera ku mipaka  yabereye i Musanze kuva tariki ya 18 kuzageza ku ya 20 Gashyantare 2026, igamije gusuzuma no gukemura ibibazo by’umutekano n’ubufatanye ku mipaka y’ibihugu byombi.

Iyi nama y’iminsi itatu yibanze ku gusuzuma ibibazo by’umutekano bihari, gukomeza ibikorwa byubaka amahoro, guteza imbere ubucuruzi n’ibikorwa byambukiranya imipaka, ndetse no kugaragaza amahirwe y’inganda n’ubukerarugendo mu Ntara y’Amajyaruguru.

Iyi nama yitabiriwe n’abayobozi b’Amadiviziyo y’Ingabo z’u Rwanda akorera ku mupaka w’u Rwanda na Uganda, bayobowe na Major General Ruki Karusisi uyobora Diviziyo ya 5 na Brigadier General Deo Rusanganwa uyobora Diviziyo ya 2.

Ku ruhande rwa UPDF haje abayobozi  ba Diviziyo ya 2 y’Ingabo zirwanira ku butaka bayobowe na Major General Paul Muhanguzi. Abayobozi bakuru mu nzego za gisivili n’umutekano bo mu bihugu byombi na bo bitabiriye iyi nama, barimo Guverineri w’Intara y’Amajyaruguru Maurice Mugabowagahunde, ndetse n’abahagarariye inzego z’ibanze na Polisi.

Ibiganiro byibanze ku gusuzuma ishyirwa mu bikorwa ry’imyanzuro yafatiwe mu nama zabanje, cyane cyane ku bijyanye no kurwanya ibikorwa binyuranyije n’amategeko byambukiranya imipaka no guhangana n’ibibazo bishya by’umutekano.

Impande zombi zasuzumye intambwe imaze guterwa mu guhanahana amakuru, gushyiraho uburyo bwo kugenzura bufatanyije, no guhuza ingamba zigamije kubungabunga ituze ku mupaka uhuza ibihugu byombi.

Mu gihe itsinda ry’abashyitsi ryageraga i Musanze, ryabanje kugirana ibiganiro n’abayobozi b’Intara, rihabwa ibisobanuro ku bikorwa by’iterambere bifitanye isano n’iyi gahunda y’ubufatanye ku mipaka. Guverineri Mugabowagahunde yashimye imikoranire y’Ingabo z’ibihugu byombi mu kurwanya ubucuruzi butemewe, icuruzwa ry’ibiyobyabwenge n’icuruzwa ry’abantu, anagaragaza amahirwe y’ubukungu ari mu Ntara y’Amajyaruguru.

Yagaragaje ko iterambere ry’inganda rigira uruhare runini mu kuzamura umusaruro mbumbe w’igihugu (GDP), anashimangira akamaro k’ubukerarugendo, by’umwihariko Pariki y’Ibirunga.

Abayobozi b’ingabo ku mpande zombi bashimangiye akamaro k’iyi nama. Brigadier General Deo Rusanganwa yavuze ko ari urubuga rukomeye rwo kubaka icyizere, guteza imbere kuvugana ku mpande zombi, ubufatanye no gukemura vuba ibibazo bivuka ku mipaka.

Major General Muhanguzi na we yashimangiye ko ibiganiro bigendera ku murongo usobanutse w’ubuyobozi, ari ingenzi mu kubungabunga ubusabane, umutekano, no guteza imbere iterambere ry’akarere.

Uretse ibiganiro byabereye mu cyumba cy’inama, iri tsinda ryanasuye ibikorwa by’ingenzi by’ubukungu biherereye i Musanze, birimo Icyanya cy’inganda cya Musanze, uruganda rwa Gorilla Textile Ltd, n’uruganda rwa CIMERWA rukorera i Musanze.

Biteganyijwe kandi ko bazasura Ikigo cya Mutobo gishinzwe gusubiza mu buzima busanzwe no gusubiza mu muryango abahoze mu mitwe yitwaje intwaro.

 

Like This Post?

• Share On:

Related Posts

---