Yanditswe na: NDAYISENGA Clement
11/03/2026 14:18
Mu Karere ka Rubavu, abacoracora (abambutsa ibicuruzwa mu buryo butemewe n'amategeko) batanu (5) barwanyije Polisi irabarasa umwe muri bo ahasiga ubuzima mu gihe abandi bane (4) bakometse.
Ibi
byabaye mu gitondo cyo kuri uyu wa Gatatu, tariki ya 11 Werurwe 2026, mu Karere
ka Rubavu, mu Ntara y'Iburengerazuba, hafi y'umupaka uhuza u Rwanda na
Repubulika Iharanirana Demokarasi ya Congo (RDC) ahakunze kwambukirizwa
ibicuruzwa mu buryo butemewe n'amategeko babikuye muri icyo gihugu.
Abarashwe
basanzwe bambutsa ibicuruzwa bitandukanye mu buryo butemewe n'amategeko, ubwo
bafatwaga bavuye muri RDC barwanyije inzego z'umutekano zirimo na Polisi y'u
Rwanda irasabarasa umwe ahita ahasiga ubuzima.
Kugira
ngo nyakwigendera araswe na Polisi y'u Rwanda byatewe nuko ubwo yabahagarikaga
umwe muri bo yahise akubita inkoni umupolisi na we mu kwitabara ni bwo yahise
arasa umwe ahita ahasiga ubuzima.
Amakuru
atangwa n'abaturage avuga ko uwarashwe na Polisi yari asanzwe agenda imbere
y'abacoracora kugira ngo abarindire umutekano.
Umuvugizi
wa Polisi y'u Rwanda mu Ntara y'Iburengerazuba, SP Sylvestre Twajamahoro, avuga
ko kugira ngo uwo muturage araswe byatewe nuko yayirwanyije mu kwitabara
araraswa.
Yakomeje
asaba abaturage kwirinda gukora ibikorwa binyuranyeje n'amategeko kuko bigira
ingaruka zitandukanye.
Ingingo
ya 87 y’Itegeko No. 026/2019 ryo ku wa 18/09/2019 rigena uburyo bw’isoresha,
iteganya ko; umuntu wese ugambiriye kutishyura umusoro ukoze igikorwa cyo
guhisha ibicuruzwa bisoreshwa cyangwa imitungo ifitanye isano n’ubucuruzi; aba
akoze icyaha cyo kunyereza umusoro.
Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarengeje imyaka itanu (5).
