• “Icyihutirwa kuri RDC si uguhindura Itegeko Nshinga”- Diomi Ndongala

Mu gihe impaka ku ivugururwa cyangwa ihindurwa ry’Itegeko Nshinga zikomeje gufata indi ntera mu rwego rwa politiki muri Reubulika ya Demokarasi ya Congo, Perezida w’ishyaka Démocratie Chrétienne (DC), Eugène Diomi Ndongala, arasaba ko igihugu cyashyira imbere ibibazo byihutirwa kurusha ibindi.

Avuga ko gutekereza neza ku nyungu z’igihugu bisaba ko umutungo n’imbaraga by’igihugu byibandwaho ku bibazo bikomeye cyane: kuzamura imibereho n’imibereho myiza y’abaturage ba Congo ndetse no kugarura amahoro arambye.

Muri ibi bihe avuga ko bikomeye, uyu munyapolitiki agaragaza ko bamwe mu banyapolitiki bari kuyobya ibiganiro by’abaturage, bakaberekeza ku mpaka zitita ku bibazo by’ingenzi igihugu kirimo.

Nk’uko Diomi Ndongala abivuga, “icyihutirwa si ivugururwa ry’Itegeko Nshinga, kandi byongeye rikaba ryanagorana gushyirwa mu bikorwa mu gihe igice cy’ubutaka bw’igihugu kikigenzurwa n’abandi. Icy’ingenzi ni kurinda ubusugire bw’igihugu.”

Mu kiganiro yahaye ikinyamakuru MCP kuri uyu wa gatatu tariki ya 11 Werurwe 2026, yashimangiye igitekerezo cye mu nteruro imwe agira ati:“Umutekano ubanze, ibijyanye n’Itegeko Nshinga bizakurikiraho.”

Yemeza ko ibiganiro byimbitse ku mikorere y’inzego za Leta bitashoboka neza mbere y’uko intambara iri mu burasirazuba bw’igihugu irangira.

Asobanura ko icy’ingenzi ari ugusubiza ububasha bwa Leta mu bice byose by’igihugu, cyane cyane mu mijyi nka Goma, Bukavu na Bunagana, ndetse no gusaba ko ingabo z’amahanga ziri ku butaka bwa Congo zihava, hamwe no gukuraho état de siège yashyizweho mu ntara zimwe.

Agaragaza ko nyuma yo kugera kuri ibyo by’ingenzi ari bwo impaka za politiki zisanzwe zashobora gusubira mu buzima bwa demokarasi bw’igihugu.

Ati:“Mu buryo bufatika, twibaze: ni iyihe opozisiyo, rimwe na rimwe yitwa ‘opozisiyo ya caviar’ cyangwa ikorera mu buhungiro ndetse rimwe na rimwe igashinjwa gukorana n’imitwe yitwaje intwaro, ishobora guhangana n’ubutegetsi n’umukuru w’igihugu igihe yaba yatsinze intambara akanongera guhuza igihugu cyose cya DRC?”

Avuga ko ubwitonzi n’ubusesenguzi bufatika bigomba kuguma ari byo biyobora ibikorwa bya politiki, kugira ngo hamenyekane igihe gikwiye n’ibigomba gufatwaho ibyemezo bikomeye bya politiki mu gihe kiri imbere.

Like This Post?

• Share On:

Related Posts

---