• RDC: AFC/M23 irashinja Kinshasa kongera kugaba ibitero ku basivili

Imirwano yongeye gukaza umurego mu bice bitandukanye by’uburasirazuba bwa Repubulika Iharanira Demokarasi ya Congo, aho ihuriro ry’ingabo zishyigikiye ubutegetsi bwa Kinshasa ryatangije ibitero bikomeye ku mirongo myinshi y’urugamba.

Iri huriro rigizwe na FARDC, FDLR, imitwe ya Wazalendo, abacanshuro ndetse n’ingabo z’u Burundi (Force de Défense Nationale du Burundi), rivugwaho kugaba ibitero rikoresheje imbunda ziremereye n’indege zitagira abapilote (drones), byibasira cyane ahantu hatuwe n’abaturage benshi.

Mu butumwa bwashyizwe ku rubuga rwa X n’Umuvugizi wa AFC/M23 mu bya politiki, Lawrence Kanyuka, kuri uyu wa Kabiri, tariki ya 31 Werurwe 2026, yavuze ko mu bice bya Minembwe, imidugudu ya Rugezi, Kalingi, Gakenke na Bidegu ari byo yibasiwe cyane, aho amakuru avuga ko ibisasu bikomeje kugwa muri ibyo bice.

Mu karere ka Kalehe, igitero cyagabwe i Lubimbishi no mu nkengero zaho, mu gihe muri Lubero, Kabesebese na Mutondi na ho hakomeje kumvikana urusaku rw’intwaro ziremereye.

Lawrence Kanyuka, yavuze ko ubutegetsi bwa Kinshasa bwafashe icyemezo cyo gusubira ku ntambara aho gukomeza inzira y’amahoro.

Yagize ati;“Turamagana byimazeyo iki cyemezo kidasobanutse cyo kureka inzira y’ibiganiro by’amahoro, hagatoranywa intambara. Ibi bigaragaza ko ubutegetsi bwa Kinshasa butifuza igisubizo kirambye ku kibazo cyo mu burasirazuba.”

Yakomeje ashimangira ko uwo mutwe uzakomeza kurinda abaturage agira ati:“AFC/M23 yiyemeje kurinda abaturage n’imitungo yabo. Ntidushobora kwihanganira ibitero byibasira abasivili.”

Intambara yo mu burasirazuba bwa Repubulika Iharanira Demokarasi ya Congo imaze igihe kirekire, igaragaramo imitwe myinshi yitwaje intwaro iharanira inyungu zitandukanye zirimo kugenzura umutungo kamere n’ibibazo by’umutekano w’akarere.

FDLR ni umwe mu mitwe imaze igihe ivugwaho guhungabanya umutekano, mu gihe AFC/M23 yo yongeye kugaragara cyane mu mirwano mu myaka ya vuba.

Ibitero biri kugabwa mu bice bituwe n’abaturage benshi bikomeje guteza impungenge zikomeye, zirimo:

•        impfu n’inkomere ku basivili

•        kwimurwa kw’abaturage benshi (guhunga)

•        ibibazo by’ubutabazi n’inzara

•        kwangirika kw’ibikorwaremezo

Imiryango mpuzamahanga isaba impande zose guhagarika ibitero byibasira abasivili no gusubira ku meza y’ibiganiro.

Mu gihe imirwano ikomeje, haracyari urujijo ku cyerekezo cy’iyi ntambara: niba hazabaho gusubira mu biganiro bya dipolomasi cyangwa niba intambara izarushaho gukaza umurego.

Like This Post?

• Share On:

Related Posts

---