• USA: Umuhanzi D4vd yatawe muri yombi akekwaho ubwicanyi

Umuhanzi w’Umunyamerika D4vd yatawe muri yombi n’inzego z’umutekano zo muri Los Angeles, akekwaho kwica umukobwa w’imyaka 14 witwa Celeste Rivas Hernandez.

Polisi ya Los Angeles yatangaje ko uyu muhanzi w’imyaka 21, amazina ye nyakuri akaba David Burke, afunzwe nta ngwate mu gihe iperereza rikomeje ku cyaha cy’ubwicanyi akekwaho.

Uru rubanza rufitanye isano n’iperereza ku rupfu rwa Celeste Rivas Hernandez, umurambo we wabonetse ku wa 8 Nzeri mu modoka yo mu bwoko bwa Tesla Model Y yari yaratereranywe. Iyi modoka yari yanditse ku izina rya D4vd, nk’uko bigaragara mu nyandiko z’ubutabera.

Amakuru yerekana ko iyo modoka yari yarakuwe mu gace gakize ka Hollywood Hills, aho yari imaze igihe idakoreshwa. Umurambo w’uwo mwana wabonetse umunsi umwe nyuma y’uko yagombaga kwizihiza isabukuru ye y’imyaka 15.

Polisi yatangaje ko dosiye y’uru rubanza igiye gushyikirizwa ubushinjacyaha bwo mu ntara ya Los Angeles, kugira ngo hasuzumwe niba hari ibimenyetso bihagije byatuma aregwa ku mugaragaro.

Ibiro by’umushinjacyaha byemeje ko ishami rishinzwe ibyaha bikomeye rigiye gusuzuma neza uru rubanza mbere yo gufata icyemezo.

Byongeye kandi, D4vd yari asanzwe akorwaho iperereza n’itsinda ryihariye rya “grand jury” ryo muri Los Angeles ku bijyanye n’uru rupfu.

Uyu muhanzi yari amaze kwamamara cyane mu rubyiruko, cyane cyane ab’igisekuru cya “Gen Z”, kubera umuziki uhuza injyana za hard rock, R&B na pop.

Yamamaye cyane mu 2022 abinyujije ku rubuga rwa TikTok, aho indirimbo ye Romantic Homicide yakunzwe cyane ikagera ku mwanya wa kane ku rutonde rwa Billboard Hot Rock & Alternative Songs.

Ifungwa rya D4vd ryateje impaka nyinshi ku mbuga nkoranyambaga, aho abakunzi be n’abandi bantu batandukanye bakomeje gukurikirana hafi uko iperereza rigenda.

Kugeza ubu, haracyategerejwe icyemezo cy’ubushinjacyaha ku bijyanye n’uko azaregwa ku mugaragaro cyangwa niba iperereza rizakomeza gushakisha ibimenyetso byinshi.

 

 

Like This Post?

• Share On:

Related Posts

---