Yanditswe na: NDAYISENGA Clement
04/05/2026 13:21
Mu gihe Leta y’u Rwanda yashoraga miliyari nyinshi mu kugura inyubako izwi nka “RDB Building” iherereye ku Gishushu mu Mujyi wa Kigali, yongeye kuvugisha benshi nyuma y’uko hafashwe icyemezo cyo kuyifunga by’agateganyo ngo ivugururwe, hashize imyaka ibiri gusa itangiye gukoreshwa.
Iyi nyubako ifite amagorofa 12 n’andi ane yo munsi y’ubutaka, yaguzwe na Leta mu rwego rwo kugabanya amafaranga yatangwaga mu gukodesha inyubako z’ibigo bya Leta.
Icyo gihe byari byitezwe ko izafasha guhuriza hamwe ibigo bitandukanye birimo Urwego Rushinzwe Iterambere mu Rwanda (RDB), Ikigo cy’Igihugu gishinzwe kurengera ibidukikije (REMA), Ikigo gishinzwe imiturire (RHA), ndetse n’Ikigo gishinzwe mine, peteroli na gaz (RMB).
Ariko n’ubwo yaguzwe nk’umuti w’ikibazo cy’amikoro yakoreshwaga mu bukode, iyi nyubako ntiyahwemye kuvugwaho ibibazo by’ubuziranenge kuva mbere y’uko igurwa.
Gufungwa kwayo n’impamvu zitangwa
Urwego Rushinzwe Iterambere mu Rwanda (RDB) rwatangaje ko guhera tariki ya 05 Gicurasi 2026, iyi nyubako izafungwa by’agateganyo kugira ngo ikorerwe ivugurura ryari riteganyijwe.
Abakozi bayikoreragamo bamaze iminsi bamenyeshejwe ko bagomba kwimuka, mu gihe ibikorwa byayo bizakomeza gukorerwa ahandi by’agateganyo. Serivisi zimwe, zirimo iza One Stop Centre, zizajya zitangirwa mu nyubako ya Minisiteri y’Ibikorwaremezo (MININFRA) iherereye ku Kimihurura, mu gihe izindi zizakomeza gutangwa hifashishijwe ikoranabuhanga.
RDB ivuga ko iri vugurura rigamije gukemura ibibazo byagaragaye mu igenzura ryakozwe ku nyubako, ryemeje ko hari ibice bitujuje ibisabwa mu bwubatsi.
Amateka y’iyi nyubako n’impaka ziyikurikiye
Amakuru agaragaza ko iyi nyubako yaguzwe kuri miliyari zisaga 42 z’amafaranga y’u Rwanda (42.650.309.400Frw) n’ubwo hari hashize igihe havugwa ko ifite inenge mu bwubatsi.
Ikigo cy’u Rwanda gishinzwe imiturire (RHA) cyigeze gutangaza ko mbere yo kuyigura, hari hakozwe isesengura rigamije kureba niba ifite ibibazo bikomeye. Icyo gihe byemejwe ko hari inenge zishobora gukosorwa, zirimo izikomoka ku buryo yashushanyijwemo n’izaturutse ku iyubakwa ryayo.
Mu masezerano y’ubugure, byari byateganyijwe ko nyir’inzu agomba kubanza gukosora ayo makosa. Icyakora, byaje kugaragara ko atabishoboye uko bikwiye, bituma Leta ifata icyemezo cyo gufatira amafaranga agera kuri miliyari ebyiri z’amafaranga y’u Rwanda nk’uko byari bikubiye mu masezerano.
Ibibazo byakomeje kwigaragaza
N’ubwo hari ingamba zafashwe zo gukosora ibibazo byagaragaye mbere, amakuru aturuka ku bakozi bahakorera agaragaza ko uko igihe cyagiye gishira, inyubako yakomeje kugaragaza ibindi bibazo birimo ibice byangiritse ndetse n’ibibazo by’imiterere yayo.
Bimwe muri ibyo bibazo byageze ku rwego rwateje impungenge ku mutekano w’abayikoreramo, bituma hafatwa umwanzuro wo kuyifunga by’agateganyo kugira ngo ibanze ivugururwe mu buryo bwimbitse.
Impaka ku ikoreshwa nabi ry’umutungo wa Leta
Ku mbuga nkoranyambaga, iyi nyubako yongeye guteza impaka, aho bamwe bibaza uburyo inyubako nshya yaguzwe amafaranga menshi ishobora kugaragaza ibibazo bikomeye mu gihe gito gutyo.
Hari abagaragaza impungenge ku mikorere y’amasoko ya Leta, cyane cyane mu bijyanye no kugura no kwakira inyubako, bibaza niba igenzura rikorwa mbere riba rihagije.
N’ubwo hari ibyo bibazo byose bivugwa, ubuyobozi bwa RDB bwemeza ko serivisi zizakomeza gutangwa nta nkomyi, ndetse ko ivugurura rizatuma inyubako irushaho kuba yujuje ibisabwa, igasubira gukoreshwa mu buryo butekanye kandi burambye.
Icyakora, ku baturage n’abakurikiranira hafi imikorere ya Leta, iki kibazo gikomeje kuba isomo ku micungire y’imitungo rusange no ku kamaro ko kugenzura neza imishinga mbere y’uko ishyirwa mu bikorwa.
Like This Post? Related Posts
