• Iran yerekanye imbaraga mu mazi irasa ku bwato muri Hormuz n’icyambu cya UAE

Ingabo za Iran zagabye ibitero mu muhora wa Hormuz, zirasa ubwato butandukanye ndetse zinarasa hafi y’inkengero z’icyambu cya Leta Zunze Ubumwe z’Abarabu (UAE), mu kigaragara nk’igikorwa cyo kugaragaza ko zigifite ubushobozi bwo guhangana n’ingabo za Amerika.

Ibi bibaye nyuma y’uko Leta Zunze Ubumwe za Amerika zari zategetse ingabo zayo zirwanira mu mazi gutangiza ibikorwa byo gufungura umuhora wa Hormuz, hagamijwe gutuma ubwato bwongera kunyuramo neza.

Amakuru aturuka mu nzego zitandukanye avuga ko Iran yarashe ubwato bwinshi bwari mu muhanda w’inyanja wa Hormuz, nyuma y’uko ubuyobozi bwa Amerika butangije igikorwa bwise ‘Project Freedom’, kigamije kurinda no kuyobora ubwato bwari bwabuze inzira muri uwo muhora ku ruhande rwa Iran.

Mu masaha ya mbere yo ku wa 04 Gicurasi 2026, nta bwato butwaye ibicuruzwa bwari bwabashije kunyura muri uwo muhora, ibintu byakomeje kuzamura impungenge ku isoko mpuzamahanga.

Ingabo za Amerika zatangaje ko hari ubwato bubiri bwabashije kunyura muri Hormuz, ariko Iran ihita ivuga ko ayo makuru ari ibinyoma.

Umuyobozi w’ingabo za Amerika zikorera mu Burasirazuba bwo Hagati na we yavuze ko barashe ubwato buto bwa Iran, gusa Tehran na yo yahakanye ayo makuru.

Ku ruhande rwayo, Iran yasohoye ikarita yerekana ko igenzura ahantu hanini h’amazi arenze umuhora wa Hormuz, harimo n’igice cy’amazi mpuzamahanga ndetse n’inkengero za UAE.

Hagati aho, Korea y’Epfo yatangaje ko imwe mu mato yayo atwara ibicuruzwa yarasiwe muri Hormuz, mu gihe urwego rw’u Bwongereza rushinzwe umutekano wo mu mazi rwemeje ko hari ubwato bubiri bwarasiwe hafi y’icyambu kiri ku ruhande rwa UAE.

Sosiyete yo muri UAE icuruza ibikomoka kuri peteroli na yo yatangaje ko ubwato bwayo butari butwaye ibintu bwagabweho igitero n’indege zitagira abapilote (drones) za Iran.

Kugeza ubu, umuhora wa Hormuz unyuramo hafi 20% by’ibikomoka kuri peteroli ikoreshwa ku Isi uracyafunze, ibintu bishobora kugira ingaruka zikomeye ku bukungu bw’Isi.

 

Like This Post?

• Share On:

Related Posts

---