Yanditswe na: NSENGIYUMVA J Damascene
10/05/2026 22:02
Umurwa mukuru wa Kenya Nairobi uri kwakira bamwe mu bayobozi bakomeye ku mugabane wa Afurika n’i Burayi mu nama ya Africa Forward Summit, igamije gushakira Afurika inzira nshya z’iterambere n’ubufatanye mpuzamahanga.
Kuri uyu wa ku wa 10 Gicurasi 2026 Perezida wa Kenya, William Ruto,
yakiriye Perezida w’u Bufaransa, Emmanuel Macron, witabiriye inama izabera i Nairobi kuva ku wa 11 kugeza ku wa 12
Gicurasi 2026.
Macron yakiriwe ku Kibuga Mpuzamahanga cy’Indege cya Jomo Kenyatta
International Airport n’abayobozi bakuru ba Kenya barimo Minisitiri w’Intebe
akaba na Minisitiri w’Ububanyi n’Amahanga, Musalia Mudavadi.
Iyi nama ifatwa nk’imwe mu zikomeye zihuza Afurika n’ibihugu by’i Burayi
ku bibazo by’iterambere, ubukungu, imiyoborere, ikoranabuhanga n’ishoramari.
Mu butumwa Perezida Ruto yashyize ku mbuga nkoranyambaga, yavuze ko
Kenya n’ubufaransa bishaka gukomeza kubaka ubufatanye bushingiye ku nyungu zihuriweho no
guteza imbere iterambere rirambye.
Africa Forward Summit yitezweho guhuza abarenga 1500 barimo abakuru
b’ibihugu na za Guverinoma barenga 30, abafata ibyemezo, abashoramari, abahanga
mu ikoranabuhanga n’urubyiruko ruhanga udushya.
Perezida Ruto yanakiriye abandi bayobozi barimo Perezida wa Liberia,
Joseph Boakai, Perezida wa Côte d’Ivoire, Alassane Ouattara, Perezida wa Sierra
Leone, Julius Maada Bio, ndetse na Perezida wa Banki Nyafurika Itsura
Amajyambere, Sidi Ould Tah.
Abitabiriye iyi nama baraganira ku buryo Afurika yakongera ubufatanye mu
nzego zirimo ubucuruzi, ubuhinzi, uburezi, ikoranabuhanga ndetse no kwimakaza amahoro
n’umutekano.
Iyi nama iri kubera i Nairobi ifatwa nk’intambwe ikomeye mu gushimangira
uruhare rwa Afurika mu miyoborere n’ubukungu bw’Isi, mu gihe ibihugu byinshi
bikomeje gushaka uburyo bushya bwo gukorana n’umugabane wa Afurika.
