Yanditswe na: DUSHIMIMANA Elias
24/08/2023 15:50
Yanditswe na Dushimimana Elias
Kuri uyu wa Kane tariki ya 24 Kanama 2023, Nibwo Ikigo gishinzwe Ubumenyi bw’Ikirere Meteo-Rwanda cyatangaje iteganyagihe ry’umuhindo wa 2023, riteguza imvura nyinshi guhera ku mu kwezi kwa Nzeri 2023.
Iyi mvura nyinshi bivugwa ko yaherukaga mu mwaka wa 1997, biteganyijwe ko izagwa mu turere twa Rubavu,Rutsiro, Musanze na Nyabihu ndetse no mu Burengerazuba bwa Ngororero.
Ikarita y’iteganyagihe igaragaza ko mu Mujyi wa Kigali na henshi mu Ntara y’Amajyepfo, mu turere twa Nyagatare na Gatsibo (Iburasirazuba) ndetse no muri Gicumbi na Rulindo mu Majyaruguru, imvura izatangira kugwa ku matariki ya 25 Nzeri-01 Ukwakira 2023.
Meteo-Rwanda ivuga ko umuhindo w’uyu mwaka wa 2023 umeze nkuwo muri 2002 na 2006, ukaba wararanzwe n’imvura nyinshi irengeje ikigero cy’isanzwe iboneka mu bindi bihe by’umuhindo.
Umuyobozi Mukuru wa Meteo-Rwanda, Aimable Gahigi agira ati "Ubushyuhe bwo mu nyanja ngari y’Abahinde n’iya Pasifika (buzwi nka El N?no), bwariyongereye muri iyi minsi burenza impuzandengo y’imvura dusanzwe tubona muri iki gihembwe, ndetse bigaragara ko buzakomeza kwiyongera".
Ati "Ni yo mpamvu muri aka Karere u Rwanda ruherereyemo imvura iteganyijwe kuziyongera muri uyu muhindo".
Ikarita y’iteganyagihe igaragaza ko mu Rwanda ahazagwa imvura nke(mu bice bimwe bya Kayonza na Kirehe) izaba igera kuri milimetero 300, ahazagwa nyinshi ikazarenga milimetero 800, mu gihe ngo bihagije ko imvura ingana na milimetero 50 iba ishobora guteza ibiza.
Meteo-Rwanda kandi ivuga ko imvura y’Umuhindo w’uyu mwaka izacika hagati y’amatariki 21-27 Ukuboza hose mu Gihugu uretse mu burasirazuba bw’uturere twa Nyagatare, Gatsibo, Kayonza na Kirehe, ho iteganyijwe gucika mbere yaho ku matariki 13-20 Ukuboza 2023.
