Yanditswe na: NDAYISENGA Clement
21/05/2026 09:30
Ishami ry'Umuryango w'Abibumbye ryita ku Buzima (OMS) ryatangaje ko bishobora gufata amezi icyenda kugira ngo haboneke urukingo rwa virusi ya Ebola yo mu bwoko bwa Bundibugyo, mu gihe iki cyorezo gikomeje guteza impungenge muri Afurika yo Hagati n’iy’Iburasirazuba.
Ibi byatangajwe ku wa 20 Gicurasi 2026 n’Umujyanama wa OMS, Vasee Moorthy, wavuze ko hari inkingo ebyiri zikomeje kugeragezwa hagamijwe guhangana n’ubu bwoko bwa Ebola.
Umuntu wa mbere wishwe n’iyi virusi yapfiriye mu Mujyi wa Bunia mu Ntara ya Ituri tariki ya 24 Mata 2026, gusa byaje kwemezwa nyuma y’ibyumweru bitandatu ko yazize Ebola yo mu bwoko bwa Bundibugyo.
Umuyobozi Mukuru wa OMS, Tedros Adhanom Ghebreyesus, yatangaje ko abantu barenga 600 bamaze kwandura iyi Ebola, mu gihe abagera kuri 139 bamaze guhitanwa na yo.
Yabitangaje mu kiganiro yagiranye n’abanyamakuru i Geneva mu Switzerland, aho hari kubera Inteko rusange ya 79 yiga ku buzima ku rwego rw’Isi iri kuba kuva tariki ya 18 kugeza ku ya 23 Gicurasi 2026.
Dr. Tedros yavuze kandi ko hari abandi bantu 51 bagaragayeho Ebola muri Democratic Republic of the Congo ndetse n’abandi babiri bayanduye muri Uganda.
Virusi ya Ebola yo mu bwoko bwa Bundibugyo yabonetse bwa mbere muri Uganda hagati ya 2007 na 2008, aho yanduje abantu 149 igahitana 37. Mu 2012 yongeye kugaragara muri RDC, mu gace ka Isiro, yandura abantu 57, ihitana 29.
Ku wa 17 Gicurasi 2026, OMS yatangaje ko kongera kugaragara kw’iki cyorezo muri RDC na Uganda biri mu bihangayikishije Isi, bitewe n’ubushobozi bwacyo bwo kwandura no guhitana abantu benshi mu gihe gito.
Like This Post? Related Posts
