Yanditswe na: NDAYISENGA Clement
23/05/2026 15:27
Perezida wa Sénégal, Bassirou Diomaye Faye, yakuye ku mwanya wa Minisitiri w’Intebe Ousmane Sonko ndetse anasesa Guverinoma yose, mu cyemezo gikomeje kuvugisha benshi muri iki gihugu no hanze yacyo.
Iyi mpinduka ikomeye ibaye nyuma y’amezi menshi havugwa kutumvikana hagati ya Faye na Sonko, aba bagabo babiri bari barabanye nk’inshuti za hafi ndetse bakaba barafatanyije urugamba rwa politiki rwagejeje Faye ku butegetsi mu matora yo mu mwaka wa 2024.
Sonko, ufite igikundiro gikomeye cyane mu rubyiruko no mu bakurikiranira hafi politiki ya Sénégal, ni we wari washyigikiye cyane kandidatire ya Faye nyuma y’uko we ubwe atemerewe kwiyamamaza kubera ibibazo by’amategeko yari akurikiranyweho icyo gihe.
Nyuma yo kwirukanwa, Sonko yanyujije ubutumwa ku mbuga nkoranyambaga agaragaza ituze, avuga ko “aryama atuje”, amagambo benshi bafashe nk’ikimenyetso cy’uko yari yariteguye icyo cyemezo cyangwa ko adatewe ubwoba n’ingaruka zacyo muri politiki.
Kutumvikana ku bukungu n’imikoranire na IMF
Amakuru aturuka mu buyobozi bwa Sénégal agaragaza ko umuzi w’ukutumvikana hagati ya Perezida Faye na Sonko wari ushingiye cyane ku buryo igihugu cyakemura ikibazo gikomeye cy’ubukungu kiri guhanganye na cyo.
Mu mezi ashize, International Monetary Fund yahagaritse gahunda y’inguzanyo ya miliyari 1,8 z’amadolari yari yarageneye Sénégal, nyuma y’uko hagaragaye amakuru y’imyenda bivugwa ko itatangajwe mu mucyo.
Ibi byatumye umwenda wa Leta ya Sénégal uvugwa ko wageze ku gipimo cya 132% by’umusaruro mbumbe w’igihugu (GDP), ibintu byakangaranyije abafatanyabikorwa mpuzamahanga n’abasesenguzi b’ubukungu.
Perezida Faye yashakaga uburyo bwo kongera kuganira na IMF kugira ngo Sénégal ibone inkunga n’inguzanyo byafasha kuzahura ubukungu bwifashe nabi, ariko amakuru menshi avuga ko Sonko atari ashyigikiye bimwe mu byasabwaga kugira ngo ayo masezerano asubukurwe.
Ibiciro bya lisansi byabaye intandaro y’icyibazo
Mbere gato y’iyirukanwa rya Sonko, Minisitiri w’Imari wa Sénégal, Cheikh Diba, yari yabwiye Inteko Ishinga Amategeko ko igihugu giteganya gusubukura ibiganiro na IMF mu cyumweru gitangira tariki ya 8 Kamena 2026.
Yavuze kandi ko Sénégal yizeye ko izaba yamaze kumvikana na IMF ku ngingo z’ingenzi mbere y’uko Kamena 2026 irangira.
Cheikh Diba yanaburiye ko amafaranga Leta ikoresha mu kugabanya ibiciro bya lisansi n’ibindi bikomoka kuri peteroli ashobora kurenga cyane ayo yari ateganyijwe mu ngengo y’imari ya 2026.
Amakuru ya hafi mu buyobozi bwa Sénégal avuga ko Sonko yari yarwanyije gahunda yo kuzamura ibiciro bya lisansi, kuko yabonaga bishobora guteza uburakari abaturage no kongera igitutu ku mibereho y’abaturage basanzwe bafite ibibazo by’ubuzima buhenze.
Icyo iyi mpinduka isobanuye muri politiki ya Sénégal
Kwamamaza Sonko no gusesa Guverinoma bishobora gutangiza icyiciro gishya cya politiki muri Sénégal, igihugu cyari gisanzwe gifatwa nk’icy’intangarugero mu demokarasi muri Afurika y’Iburengerazuba.
Abasesenguzi bavuga ko gutandukana kwa Faye na Sonko bishobora kugira ingaruka zikomeye ku ishyaka ryabo no ku cyizere abaturage bari barafitiye ubuyobozi bushya bwari bwijeje impinduka zikomeye mu miyoborere n’ubukungu.
Hari kandi impungenge ko uku kutumvikana gushobora kongera ubushyamirane muri politiki, cyane cyane mu rubyiruko rufata Sonko nk’ikimenyetso cy’impinduka n’ubwisanzure muri Sénégal.
Perezida Faye wa Senegal yirukanye Sonko ku mwanya wa Minisitiri w’Intebe anasesa Guverinoma
Like This Post? Related Posts
