• RDC yahagaritse ibikorwa bihuza imbaga i Kinshasa kubera Ebola, byitwa amayeri ya politiki

Leta ya Repubulika Iharanira Demokarasi ya Congo (RDC), yatangaje ko ibikorwa byose bihuza abantu benshi bihagaritswe by’agateganyo mu mujyi wa Kinshasa no mu ntara za Tshopo, Haut-Uele na Bas-Uele, ivuga ko icyo cyemezo kigamije gukumira ikwirakwira ry’icyorezo cya Ebola.

Minisitiri w’Umutekano, Jacquemain Shabani, yavuze ko ibikorwa birimo imyigaragambyo, inama z’amashyaka ya politiki, amakoraniro n’ibindi bihuza imbaga y’abantu bitazongera kwemerwa muri utwo duce kugeza igihe ubuyobozi buzabimenyeshereje.

Leta ivuga ko iki cyemezo gifashwe mu gihe Ebola ikomeje guteza impungenge, aho imaze guhitana abantu 360 mu barenga 1,200 bamaze kuyandura, cyane cyane mu Ntara ya Ituri. Abayobozi bavuga ko kugabanya amahuriro y’abantu ari imwe mu ngamba zo gukumira ikwirakwira ry’iki cyorezo.

Icyakora, amashyaka atavuga rumwe n’ubutegetsi ntiyemera ibisobanuro bya Leta. Avuga ko ubutegetsi bwa Perezida Antoine Félix Tshisekedi buri gukoresha icyorezo cya Ebola nk’impamvu yo kuburizamo ibikorwa bya politiki no gukumira imyigaragambyo iteganyijwe.

Prince Epenge, uvugira ihuriro ry’amashyaka atavuga rumwe n’ubutegetsi rya Lamuka, yavuze ko aya mabwiriza yashyizweho ku bwumvikane hagati ya Leta n’ishyaka riri ku butegetsi, UDPS, agamije kubangamira imyigaragambyo iteganyijwe ku wa 8 Nyakanga 2026.

Iyo myigaragambyo yateguwe n’ihuriro rya C64, rihuza abanyapolitiki n’indi miryango ya sosiyete sivile bavuga ko bashaka kurinda iyubahirizwa ry’Itegeko Nshinga.

Aba bavuga ko Perezida Félix Tshisekedi atemerewe kongera kwiyamamariza indi manda mu matora y’Umukuru w’Igihugu ateganyijwe mu 2028, bityo bakaba barwanya icyo bita umugambi wo guhindura cyangwa kurenga ku Itegeko Nshinga.

Iki cyemezo cya Leta gikomeje guteza impaka muri RDC, aho bamwe bagishyigikira bavuga ko kigamije kurengera ubuzima bw’abaturage, mu gihe abandi bagifata nk’uburyo bwo kugabanya urubuga rw’amashyaka atavuga rumwe n’ubutegetsi mbere y’ibihe bya politiki bikomeye igihugu kirimo kwitegura.

Like This Post?

• Share On:

Related Posts

---