• Abasirikare babiri bakuru ba RDF barangije amasomo komeye ya Gisirikare muri Qatar

Abasirikare babiri bakuru bo muri RDF Lt Col Christian Mushengezi na Lt Col John Bosco Kamuhangire, barangije amasomo yo ku rwego rwo hejuru mu bijyanye n’inyigisho za gisirikare (Defence Studies) nyuma yo gusoza neza gahunda y’amahugurwa yamaze amezi icumi yabereye muri Qatar.

Aya masomo bayakurikiranye muri Joaan bin Jassim Academy for Defence Studies, ikigo kizwiho gutanga amahugurwa yihariye agamije kongerera ubushobozi abayobozi bakuru b’ingabo mu miyoborere, igenamigambi n’imicungire y’ibikorwa bya gisirikare.

Gahunda aba basirikare bitabiriye yamaze amezi icumi, ikaba yari igamije kubongerera ubumenyi mu miyoborere ya gisirikare, gutegura no kuyobora ibikorwa by’umutekano, gukora isesengura ry’ibibazo by’umutekano ku rwego mpuzamahanga no gufata ibyemezo bishingiye ku bumenyi.

Abitabiriye ayo masomo baturutse mu bihugu bitandukanye, bituma habaho kungurana ubunararibonye hagati y’abayobozi b’ingabo bo mu bice bitandukanye by’isi.

 

Uretse amasomo ya gisirikare, Lt Col Christian Mushengezi na Lt Col John Bosco Kamuhangire banarangije amasomo y’ururimi rw’Icyarabu.

Kumenya uru rurimi bizabafasha kurushaho kunoza imikoranire n’ingabo zo mu bihugu bikoresha Icyarabu, ndetse byorohereze u Rwanda gukomeza kwagura ubufatanye mu bya gisirikare n’ibihugu byo mu Burasirazuba bwo Hagati.

Abasesenguzi bavuga ko ubumenyi bw’indimi z’amahanga ari kimwe mu bifasha abasirikare bakuru gukorana neza n’ingabo zo mu bindi bihugu, cyane cyane mu butumwa mpuzamahanga bwo kubungabunga amahoro no mu mahugurwa ahuriweho.

Umuhango wo gutanga impamyabumenyi wabaye uyobowe na Nyakubahwa Sheikh Saud bin Abdulrahman Al Thani, Minisitiri Wungirije w’Intebe akaba na Minisitiri wa Leta ushinzwe Ibikorwa by’Ingabo muri Qatar.

Uyu muhango wanitabiriwe n’abayobozi bakuru b’Ingabo za Qatar, abadipolomate bahagarariye ibihugu byabo muri Qatar ndetse n’izindi ntumwa z’icyubahiro.

Ku ruhande rw’u Rwanda, umuhango witabiriwe na Colonel Bernard Niyomugabo, Uhagarariye Ingabo z’u Rwanda mu bya gisirikare muri Qatar (Rwanda Defence Attaché).

Kurangiza aya masomo ni kimwe mu bimenyetso by’ubufatanye bukomeje kwaguka hagati y’u Rwanda na Qatar, cyane cyane mu rwego rw’umutekano, amahugurwa ya gisirikare no kongerera ubushobozi abasirikare.

Mu myaka ishize, ibihugu byombi byakomeje gushimangira umubano wabyo binyuze mu masezerano y’ubufatanye mu nzego zitandukanye zirimo umutekano, ubwikorezi, uburezi n’ishoramari.

Ingabo z’u Rwanda zikomeje kohereza abasirikare bazo mu mahugurwa yo ku rwego mpuzamahanga hagamijwe kubaka ubushobozi bw’abayobozi bazo no kubongerera ubumenyi bujyanye n’ibibazo by’umutekano by’iki gihe.

Ubuyobozi bwa RDF bukomeje gushyira imbere amahugurwa nk’inzira yo kubaka ingabo zikora kinyamwuga kandi zifite ubushobozi bwo gusohoza inshingano zazo haba mu gihugu imbere no mu butumwa mpuzamahanga bwo kubungabunga amahoro.

Kurangiza amasomo kwa Lt Col Christian Mushengezi na Lt Col John Bosco Kamuhangire ni indi ntambwe igaragaza ubushake bwa RDF bwo gukomeza guteza imbere ubumenyi n’ubushobozi bw’abasirikare bayo, no gukomeza kuba umwe mu mitwe y’ingabo yubahwa ku rwego rw’Afurika no ku rwego mpuzamahanga.

 

 

Like This Post?

• Share On:

Related Posts

---