• Guinée: Uwahoze ari Minisitiri w'Intebe Ibrahima Kassory Fofana yagabanyirijwe Igihano

 

Urukiko rw'Ubujurire rwa Guinea ku wa Kane rwagabanyije igihano cyari cyarahawe uwahoze ari Minisitiri w'Intebe, Ibrahima Kassory Fofana, wari warahamijwe ibyaha birimo gukungahara mu buryo bunyuranyije n'amategeko no kunyereza inkomoko y'umutungo (money laundering).

Urukiko rwamukatiye igifungo cy'imyaka itatu n'amezi icyenda, kivuye ku gifungo cy'imyaka itanu yari yarakatiwe muri Gashyantare 2025 n'Urukiko rushinzwe guhana ibyaha by'ubukungu n'iby'imari (CRIEF), rwashyizweho nyuma y'ihirikwa ry'ubutegetsi bw'abasivili n'igisirikare.

Mu mwanzuro warwo, Urukiko rw'Ubujurire rwagize Kassory Fofana umwere ku cyaha cyo kunyereza umutungo wa leta, kimwe mu byaha bitatu yari yarahamijwe mbere.

Icyakora, rwemeje ko agifite uruhare mu byaha byo gukungahara mu buryo bunyuranyije n'amategeko no kunyereza inkomoko y'umutungo.

Kassory Fofana, wafunzwe kuva muri Mata 2022, ntiyitabiriye iburanisha kubera uburwayi bwe.

Kubera ko amaze igihe kirenga igihano gishya yahawe afungiwe mu ivuriro, biteganyijwe ko ashobora kurekurwa mu minsi ya vuba.

Uretse igifungo, Urukiko rwategetse Kassory Fofana kwishyura leta miliyari eshatu z'amafaranga y'u Guinée, angana n'amadolari ya Amerika agera ku 340.000, nk'indishyi.

Rwategetse kandi ko igice cy'imitungo ye gifatirwa na leta.

Abashinjacyaha bashinjaga Kassory Fofana kunyereza miliyari 15 z'amafaranga y'u Guinée, yari yagenewe gahunda zo guhangana n'icyorezo cya Covid-19 ndetse n'indi mishinga y'iterambere ry'ubukungu n'imibereho myiza y'abaturage.

Fofana yabaye Minisitiri w'Intebe kuva muri Gicurasi 2018 kugeza muri Nzeri 2021 ku butegetsi bwa Perezida Alpha Condé, mbere y'uko ubutegetsi buhirikwa n'igisirikare.

Nyuma y'ifatwa ry'ubutegetsi n'igisirikare mu 2021, abayobozi bashya bayobowe na Mamady Doumbouya batangaje ko kurwanya ruswa ari imwe mu ntego zabo z'ibanze.

Icyo gihe, abayobozi benshi bahoze muri guverinoma, abanyapolitiki batavuga rumwe n'ubutegetsi ndetse n'abagize imiryango itegamiye kuri leta bagejejwe imbere y'inkiko cyangwa bafungwa.

Mu Kuboza gushize, Doumbouya yatorewe kuyobora Guinea muri manda y'imyaka irindwi mu matora yanenzwe n'abatavuga rumwe na leta, bavuga ko atarimo guhatana mu buryo bwisanzuye.

Kuva ubutegetsi bwa Doumbouya bwatangira, amashyaka menshi ya politiki yahagaritswe, imyigaragambyo yarabujijwe kuva mu 2022, mu gihe bamwe mu batavuga rumwe n'ubutegetsi n'abaharanira uburenganzira bwa muntu bafunzwe, bakatirwa cyangwa bagahungira mu mahanga.

Hari kandi impungenge zikomeje kugaragazwa ku iyongera ry'ibura cyangwa ishimutwa ry'abarwanashyaka batavuga rumwe n'ubutegetsi, ibintu imiryango mpuzamahanga iharanira uburenganzira bwa muntu ikomeje kwamagana.

 

 

 

Like This Post?

• Share On:

Related Posts

---