• Jackie Chandiru yasabye abakundana kwirinda gusangizanya Amafoto y’amabanga yabo

Umuhanzikazi wo muri Uganda, Jackie Chandiru, yatanze ubutumwa bukomeye asaba abagore n’abakobwa kwirinda kohereza amafoto cyangwa amashusho y’ibanga kubo bakundana, avuga ko urukundo nyarwo rutagomba gushingira ku gitutu cyo gusaba ibintu nk’ibyo.

Mu kiganiro aherutse kugirana n’itangazamakuru, Jackie Chandiru yavuze ko abantu bakwiye gusobanukirwa ko kubaka umubano ukomeye bishingira ku bwubahane, kugirana icyizere no kumenyana neza, aho gushingira ku guhererekanya amafoto cyangwa amashusho yihariye.

Mu magambo yavuze, Jackie Chandiru yanenze umuco umaze kwamamara aho bamwe basaba abo bakundana kuboherereza amafoto cyangwa amashusho agaragaza ubwambure kugira ngo bagaragaze urukundo cyangwa ubudahemuka.

Yagize ati:“Niba ushaka kumbona nkiri uko navutse, ugomba kubanza gukura ,Bitangirana no kundamutsa, tukaganira, tukamenyana buhoro buhoro mbere y'ikindi kintu cyose.”

Yasobanuye ko umuntu ushaka kugirana umubano ukomeye n’undi akwiye kubanza kubaka icyizere no kumenya uwo muntu, aho kwihutira gusaba amafoto cyangwa amashusho yihariye.

Jackie Chandiru yavuze ko umubano ufite agaciro utubakwa kuri telefone cyangwa ku guhererekanya amafoto, ahubwo wubakwa binyuze mu guhura, kuganira no kubahana.

Yongeyeho ati:“Umuntu ushaka kugera kuri urwo rwego agomba kubanza kwinjira mu buzima bwanjye mu buryo bukwiye, tukubaka umubano nyawo, aho gusaba amafoto cyangwa amashusho.”

Yashimangiye ko umuntu ugukunda by'ukuri atagomba kugushyiraho igitutu ngo umwoherereze ibintu bishobora kuzaguteza ibibazo mu gihe kiri imbere.

Uyu muhanzikazi yavuze ko hari abantu bakoresha urukundo nk'urwitwazo rwo gusaba abo bakundana amafoto cyangwa amashusho y'ibanga, ibintu yavuze ko bidakwiye.

Yagaragaje ko urukundo nyarwo rugomba kujyana no kubaha icyubahiro, ubuzima bwite n'umutekano w'uwo mukundana.

Yasabye abagore kudaterwa ubwoba no kwanga ibyo basabwa igihe bumva bitabahesha amahoro cyangwa bishobora kubagiraho ingaruka.

Amagambo ya Jackie Chandiru yakwirakwiye ku mbuga nkoranyambaga, aho abantu benshi bamushimiye ubutumwa yatanze.

Abagore n'abakobwa benshi bagaragaje ko ubutumwa bwe buje mu gihe bukenewe, cyane cyane mu gihe hakomeje kugaragara ibibazo by'abantu bashyira ku mugaragaro amafoto cyangwa amashusho y'ibanga y'abo bahoze bakundana.

Abahanga  mu bijyanye n'umutekano wo kuri murandasi bavuga ko iyo amafoto cyangwa amashusho yihariye amaze koherezwa ku wundi muntu, bigorana kuyagenzura, kuko ashobora gukwirakwizwa nta ruhushya rwa nyirayo.

Jackie Chandiru yasabye urubyiruko n'abakoresha ikoranabuhanga gutekereza neza mbere yo kohereza amakuru cyangwa amashusho yihariye.

Yashimangiye ko urukundo rudakwiye gupimirwa ku kuba umuntu yemeye kohereza amafoto y'ibanga, ahubwo ko rugomba gushingira ku bwizerane, ubwubahane no kurinda agaciro ka buri wese.

Ubutumwa bwe bukomeje gushimangirwa n'impuguke mu mutekano wo kuri internet, zisaba abantu kurushaho kurinda ubuzima bwabo bwite no kwirinda ibikorwa bishobora kubaviramo ihohoterwa cyangwa gukwirakwizwa kw'amakuru yabo bwite mu buryo bunyuranyije n'amategeko.

 

Like This Post?

• Share On:

Related Posts

---