Yanditswe na: NDAYISENGA Clement
06/07/2026 07:32
Ishyirahamwe Mpuzamahanga ry'Umupira w'Amaguru (FIFA) ryafashe icyemezo cyatunguye benshi, risubika igihano cyo gusiba umukino umwe cyari cyahawe rutahizamu wa Leta Zunze Ubumwe za Amerika, Folarin Balogun, nyuma yo guhabwa ikarita itukura mu mukino wahuje Amerika na Bosnie-Herzégovine.
Balogun yari yahawe iyo karita nyuma yo gukandagira myugariro Tarik Muharemovi? mu mukino wa 1/16 warangiye Amerika itsinze Bosnie-Herzégovine ibitego 2-0. Byari byitezwe ko azasiba umukino wa 1/8 uzahuza Ikipe y'Igihugu ya Amerika (USMNT) n'u Bubiligi.
Uyu rutahizamu ari mu bakinnyi b'ingenzi Amerika iri kugenderaho muri iri rushanwa, kuko amaze gutsinda ibitego bitatu, harimo n'icyo yatsinze Bosnie-Herzégovine mbere yo guhabwa ikarita itukura.
Mu itangazo ryashyizwe ahagaragara na FIFA, yavuze ko hashingiwe ku ngingo ya 27 y'amategeko agenga imyitwarire yayo, igihano cyo gusiba umukino umwe gisubitswe by'agateganyo mu gihe cy'umwaka umwe.
Ibi bivuze ko Balogun yemerewe gukina umukino wa 1/8, ariko mu gihe yakora ikosa nk'iryatumye ahabwa ikarita itukura mu gihe cy'umwaka umwe, icyo gihano kizahita gisubizwaho.
Iki cyemezo cyashimwe na Perezida wa Leta Zunze Ubumwe za Amerika, Donald Trump, unazwiho kugirana umubano mwiza na Perezida wa FIFA, Gianni Infantino.
Mu butumwa yanyujije ku rubuga Truth Social, Trump yagize ati:"Murakoze cyane FIFA ku gukora igikwiye no gukuraho akarengane gakomeye!"
Na none kandi, Marco Rubio, Umunyamabanga wa Leta ya Amerika ushinzwe Ububanyi n'Amahanga, yari yasabye ko hasuzumwa uburyo Balogun yahawe ikarita itukura, avuga ko hari impamvu zatuma icyo cyemezo cyongera gusuzumwa.
Ku rundi ruhande, Ishyirahamwe ry'Umupira w'Amaguru mu Bubiligi (RBFA) ryatangaje ko ryatunguwe n'iki cyemezo cya FIFA, rivuga ko guhindura igihano nyuma y'uko umusifuzi n'ikoranabuhanga rya VAR bari bamaze gufata umwanzuro bishobora guteza impaka ku ihame ryo kubahiriza amategeko kimwe ku makipe yose.
Uyu mukino wa 1/8 hagati ya Amerika n'u Bubiligi utegerejwe cyane, kuko amakipe yombi afite intego yo kugera muri 1/4 cy'irangiza. Kuba Balogun yemerewe gukina byitezwe kongerera imbaraga ubusatirizi bwa Amerika, mu gihe u Bubiligi buzaba busabwa gushaka uburyo bwo kumuhagarika.
Like This Post? Related Posts
