Yanditswe na: NSENGIYUMVA J Damascene
17/07/2026 20:50
Intambara iri hagati ya Leta Zunze Ubumwe za Amerika na Iran yakomeje gufata indi ntera, aho impande zombi zakomeje kugabana ibitero mu ijoro ryo ku wa 16 rishyira ku wa 17 Nyakanga 2026. Uko imirwano ikomeza gukaza umurego ni na ko impungenge z'uko amakimbirane ashobora gukwira mu Burasirazuba bwo Hagati zikomeje kwiyongera.
Amerika yatangaje ko yagabye ibitero bishya ku bikorwa bya gisirikare bya Iran, birimo ibirindiro byo ku nkombe z'inyanja, uburyo bwo kurinda ikirere n'ibindi bikorwaremezo bifasha ibikorwa bya gisirikare byo mu mazi. Mu hantu havuzwe ko hibasiwe harimo ikirwa cya Qeshm ndetse n'agace kegereye icyambu cya Bandar Abbas.
Iran yo yavuze ko bimwe mu bitero byagabwe ku bikorwa by'abasivili. Yatangaje ko ibiraro bibiri byo mu gace ka Bandar Khamir byangijwe, abantu nibura barindwi bagapfa, ndetse ko sitasiyo ya gari ya moshi ya Bandar Abbas n'ikibuga cy'indege cya Iranshahr na byo byangiritse.
Mu gusubiza ibyo bitero, Iran yatangaje ko yagabye ibitero ku birindiro bya Amerika biri mu karere, birimo ikigo cya gisirikare cya Al-Tanf muri Syria. Yavuze kandi ko yakoresheje drones na roketi mu bitero ku birindiro bya Amerika biri muri Jordan, Bahrain na Kuwait.
Igisirikare cya Iran kirinda Impinduramatwara (IRGC) cyongeye gutangaza ko cyarashe kandi kigasenya radar z'Amerika zari zashyizwe muri Oman, kivuga ko zakoreshwaga mu gukurikirana ibikorwa byo mu kirere no mu nyanja.
Minisiteri y'Ubuzima ya Iran yatangaje ko abantu 38 bamaze gupfa, mu gihe abarenga 400 bakomerekeye muri iyi mirwano. Muri abo harimo abagore n'abana, ibintu Iran ivuga ko bigaragaza ingaruka zikomeye ibi bitero biri kugira ku baturage.
Hagati aho, Ikigo cy'u Bwongereza gishinzwe umutekano mu nyanja (UKMTO) cyatangaje ko ubwato bwacaga hafi y'inyanja ya Oman bwatewe n'igisasu kitaramenyekana. Nubwo bwangiritse, abari baburimo bose bararokotse, bukomeza urugendo rwabwo.
Iyi ntambara yatangiye no kugira ingaruka ku bukungu bw'isi, aho ibiciro bya peteroli byongeye kuzamuka kubera impungenge z'uko umuhora wa Hormuz n'Inyanja Itukura, inzira z'ingenzi zinyuzwamo peteroli ku isi, zishobora guhungabanywa. Iran kandi yatangaje ko yasabye umutwe w'Aba-Houthi kwitegura gufunga inzira z'ubucuruzi zinyura mu Nyanja Itukura mu gihe ibitero bya Amerika byakomeza.
Mu rwego rwo gushaka igisubizo cya dipolomasi, u Bushinwa na Pakistan byahamagariye impande zombi guhagarika imirwano no gusubira ku meza y'ibiganiro kugira ngo hirindwe intambara ishobora gukwira mu karere kose.
Hagati aho, no mu Burayi umwuka w'umutekano wakomeje gukazwa, aho Polisi y'u Bwongereza yatangaje ko yataye muri yombi umugabo w'imyaka 39 ukekwaho gukorana n'urwego rw'ubutasi rwa Iran, mu iperereza rijyanye n'ibikorwa by'ubutasi.
