Yanditswe na: NSENGIYUMVA J Damascene
18/07/2026 23:38
Perezida wa Hongrie, Tamas ?Sulyok yemeje amavugurura mu itegeko nshinga yemejwe n’inteko ishinga amategeko y’iki gihugu yemeza ko manda y’uyu mukuru w’igihugu ikuweho.
Perezida Tamas ?Sulyok yabitangaje ku wa 18 Nyakanga 2026.
Ku wa 13 Nyakanga 2026, ni bwo inteko ishinga Amategeko ya Hongrie yatoye icyemezo cyo gukuraho perezida Tamas ?Sulyok, ashinjwa ko yari hafi cyane y’ubutegetsi bwa Viktor Orbán wahoze ayobora igihugu, bityo bakabona ko adashobora kuyobora atabogamye.
Minisitiri w’Intebe n’Ishyaka rye riri ku butegetsi rya Tisza bashyigikiye iki cyemezo.
Guverinoma nshya yakoresheje ubwiganze ifite ihindura Itegeko Nshinga kugira ngo ihagarike manda ya Sulyok ndetse n’iy’abandi bayobozi bari bashyizweho mu gihe cya Orbán, ivuga ko igamije kuvugurura inzego za Leta no gukuraho abantu ibona nk’abo mu butegetsi bwashize.
Hahagaritswe kandi manda ya Perezida w’Urukiko rushinzwe kurinda Itegeko Nshinga, Péter Polt.
Umunsi byakozweho wafashwe nk’umwe mu minsi ikomeye cyane mu mateka ya politiki ya Hongrie, nyuma y’uko ubutegetsi bushya bushyizweho mu ntangiriro za Gicurasi nyuma yo gutsindwa bitunguranye kw’ishyaka rya Fidesz rya Viktor Orbán mu matora yo ku wa 12 Mata.
