Yanditswe na: NSENGIYUMVA J Damascene
19/07/2026 00:14
Guverinoma y’u Bushinwa yatangaje ko iri gukurikiranira hafi icyemezo cy’u Bwongereza cyo kwigarurira uruganda rwa British Steel, rwari rusanzwe rufitwe n’ikigo cy’Abashinwa Jingye Group, ivuga ko icyo cyemezo gishobora kugira ingaruka ku cyizere cy’abashoramari b’Abashinwa.
Minisiteri y’Ububanyi n’Amahanga y’u Bushinwa yavuze ko uburyo u Bwongereza buzacyemura iki kibazo buzagira uruhare mu kwerekana niba ari igihugu cyizewe n’abashoramari b’amahanga. Yasabye ko impande zombi zakomeza ibiganiro kugira ngo haboneke umwanzuro wubahiriza inyungu za buri ruhande, harimo no gutanga indishyi ku ishoramari Jingye yakoze.
Ku wa Kane, Guverinoma y’u Bwongereza yatangaje ko yafashe burundu uburenganzira bwo kuyobora no gutunga British Steel, isobanura ko yabitewe n’impamvu zirebana n’umutekano w’igihugu, kurinda imirimo y’abakozi no gukomeza ubushobozi bw’igihugu mu gukora ibyuma by’ibanze.
Jingye Group, yaguze British Steel mu 2020 ku mafaranga angana na miliyoni 70 z’amapawundi, yavuze ko mu 2025 uru ruganda rwatakazaga hafi ibihumbi 700 by’amapawundi buri munsi. Iyi sosiyete isaba ko u Bwongereza buyishyura igihombo cyatewe n’icyemezo cyo kwigarurira uru ruganda.
British Steel ni rwo ruganda rukumbi rusigaye mu Bwongereza rukora ibyuma by’ibanze (primary steel), rukaba rutanga akazi ku bakozi barenga 2,700 mu ruganda rwa Scunthorpe ndetse n’ibihumbi by’abandi mu rwego rw’uruhererekane rw’ubucuruzi bushingiye ku byuma.
Mbere y’uko uruganda rwegurirwa leta burundu, Guverinoma y’u Bwongereza yari yarafashe ubuyobozi bw’imikorere yarwo muri Mata 2026, nyuma y’uko havutse impungenge ko Jingye ishobora guhagarika ibikorwa byarwo.
Leta y’u Bwongereza ivuga ko iki cyemezo ari ingenzi mu kurinda urwego rw’ibyuma, imishinga minini y’ibikorwaremezo ndetse n’umutekano w’igihugu, mu gihe u Bushinwa busaba ko ikibazo cyakemurwa mu buryo bwubahiriza amategeko n’uburenganzira bw’abashoramari.
