Yanditswe na: NSENGIYUMVA J Damascene
24/07/2026 18:07
Minisitiri w'Intebe wa Repubulika Iharanira Demokarasi ya Congo (RDC), Judith Suminwa, yageze mu Mujyi wa Bunia uherereye mu Ntara ya Ituri kuri uyu wa Kane, mu ruzinduko rugamije gusuzuma uko icyorezo cya Ebola gihagaze no gukomeza ibikorwa byo kugihashya.
Akigera ku Kibuga cy'Indege cya Bunia, Judith Suminwa yakiriwe n'abayobozi b'inzego zitandukanye, asuzuma abasirikare n'abapolisi bari ku murongo w'akazi mbere yo kugirana ibiganiro n'abayobozi bo muri iyo ntara.
Mu ijambo yagejeje ku baturage, yavuze ko uruzinduko rwe rugamije kubereka ko Guverinoma iri kumwe na bo muri ibi bihe bitoroshye no kurebera hamwe ingamba zakongerwa mu guhangana n'icyo cyorezo.
Yagize ati: "Twaje kureba uko ibintu bihagaze, gushyigikira abaturage no kubizeza ko Guverinoma iri kumwe namwe. Tumaze gutanga miliyoni 50 z'amadolari ya Amerika yo gushyigikira ibikorwa byo kurwanya Ebola, kandi turimo gusuzuma izindi ngamba zakwihutisha ihagarikwa ry'iki cyorezo."
Abayobozi bo muri Ituri bashimye uru ruzinduko, ariko basaba Guverinoma gukemura ibibazo bikigaragara mu rwego rw'ubuvuzi. Depite w'Intara ya Ituri, Ezeckiel Batimuki, yavuze ko nubwo hari imbaraga zashyizwe mu guhangana na Ebola, iki cyorezo gikomeje gukwira no mu duce tutari twarakigaragayemo.
Yagaragaje ko agace ka Aru kari mu twatangiye kugaragaramo ubwandu, ibintu avuga ko biteye impungenge kandi bisaba izindi ngamba zihuse.
Ku ruhande rwe, Georges, umwe mu bajyanama b'Umujyi wa Bunia, yasabye Minisitiri w'Intebe kudasubira i Kinshasa ikibazo cy'ubuvuzi kidakemutse, avuga ko uburyo abarwayi bari kwitabwaho bukomeje gutungwa agatoki.
Kuva muri Gicurasi uyu mwaka, Minisiteri y'Ubuzima muri RDC ivuga ko hamaze kwemezwa abarenga 2.500 banduye Ebola mu gihugu hose, mu gihe abarenga 1.000 bamaze guhitanwa na yo.
Intara ya Ituri ni yo yibasiwe cyane n'iki cyorezo, aho ubwandu bumaze kugera mu bice 28 muri 36 bigize inzego z'ubuzima zayo, birimo Bunia, Rwampara, Mongbwalu, Nizi na Nyankunde, bituma ubuyobozi bukomeza gushimangira ko hakenewe ingamba zihuse zo gukumira ikwirakwira ry'iki cyorezo.
