• Mali: Perezida wa Sénégal Bassirou Diomaye Faye yagiriye uruzinduko rw'akazi i Bamako

Perezida wa Bassirou Diomaye Faye yageze ku wa Kabiri i Bamako, umurwa mukuru wa Mali, mu ruzinduko rw'akazi n'ubuvandimwe rugamije gushimangira umubano hagati y'ibihugu byombi no kuganira ku bibazo byugarije akarere ka Afurika y'Iburengerazuba.

Perezida Diomaye Faye, uherutse guhabwa inshingano zo kuyobora ECOWAS , yakiriwe na Perezida w'inzibacyuho wa Mali, Assimi Goïta, bagirana ibiganiro byibanze ku gukomeza ubufatanye hagati ya Dakar na Bamako ndetse no ku bibazo bireba akarere.

Uru ruzinduko rw'amasaha 24 rwari rugamije kongera imikoranire hagati ya Sénégal na Mali, ibihugu bifitanye amateka y'ubuvandimwe n'ubufatanye mu nzego zitandukanye zirimo ubukungu, ubucuruzi, ibikorwa remezo n'umutekano.

Mu ngingo z'ingenzi zaganiriweho harimo uburyo bwo kongera imbaraga mu mikoranire y'umuryango ushinzwe guteza imbere no kubyaza umusaruro Umugezi wa Sénégal, ndetse n’ihuriro rihuza ibihugu bikoresha ifaranga rimwe mu rwego rwo guteza imbere ubukungu n'ubufatanye bw'akarere.

Abayobozi bombi banagarutse ku kibazo cy'ubwikorezi hagati y'ibihugu byombi. Mali, igihugu kidakora ku nyanja, gishingira cyane ku cyambu cya Dakar kugira ngo cyinjize ibicuruzwa bitandukanye biva mu mahanga. Nyamara, mu mezi ashize, uru rugendo rw'ubwikorezi rwagize ibibazo bikomeye bitewe n'ibitero by'imitwe yitwaje intwaro ikorera mu gace gahuza umujyi wa Kayes n'umurwa mukuru Bamako.

Ibyo bitero byatumye imodoka zitwara ibicuruzwa zitakibasha kunyura muri uwo muhanda nk'uko byari bisanzwe, ibintu byagize ingaruka ku bucuruzi no ku itangwa ry'ibicuruzwa muri Mali.

Perezida Bassirou Diomaye Faye yashimangiye ko amahoro n'umutekano ari ingenzi mu guteza imbere ubucuruzi no koroshya ubuhahirane hagati y'ibihugu byo mu karere. Yanavuze ko Sénégal yiteguye gukomeza gufatanya na Mali mu gushaka ibisubizo birambye ku bibazo by'umutekano n'iterambere.

Ku ruhande rwa Mali, Perezida Assimi Goïta yashimye uru ruzinduko, arugaragaza nk'intambwe ikomeye mu gukomeza ubucuti n'ubufatanye hagati y'ibihugu byombi. Yagaragaje ko ibiganiro byatanze amahirwe yo kurebera hamwe uburyo bwo kuzahura ubukungu no kongera umutekano mu karere.

Abasesenguzi ba politiki bemeza ko uru ruzinduko rushobora kugira uruhare mu kongera icyizere hagati ya Sénégal na Mali, ndetse no gutanga umusanzu mu gushimangira ubufatanye hagati y'ibihugu bya Afurika y'Iburengerazuba mu gihe akarere gakomeje guhangana n'ibibazo by'umutekano, iterabwoba n'ihungabana ry'ubukungu.

 

Like This Post?

• Share On:

Related Posts

---