• Dr. Kizza Besigye yaguye mu rukiko mu rubanza aregwamo ubugambanyi

 

 

 

Umunyapolitiki utavuga rumwe n'ubutegetsi bwa Uganda, Dr. Kizza Besigye, yagize ikibazo cy'ubuzima agwa mu rukiko ku wa Gatatu, tariki ya 29 Nyakanga 2026, mu gihe yari ari kuburana mu rubanza aregwamo icyaha cy'ubugambanyi (treason), cyahanishwa igihano cy'urupfu muri Uganda.

Dr. Besigye, umaze amezi menshi afunzwe adahawe ingwate, yari yitabiriye iburanisha ryabereye mu rukiko rwa Kampala. Abari bahari bavuga ko yabanje gusakuza inshuro nyinshi avuga ijambo "Stop" (Mureke) mbere yo kugwa inyuma mu mwanya w'abaregwa. Ibyo byatumye iburanisha rihagarikwa by'agateganyo, abacungagereza n'abaganga bihutira kumutabara. Nyuma yaje kujyanwa mu modoka y'imbangukiragutabara, ariko icyo gihe ubuyobozi ntibwari bwatangaza aho yari yajyanywe cyangwa uko yari amerewe.

Iyi nkuru yongeye gukaza impaka ku buzima bwa Dr. Besigye, aho umuryango we n'abamushyigikiye bamaze igihe bavuga ko ubuzima bwe bukomeje kuzahara kubera igihe kirekire amaze afunzwe.

Umugore we, Winnie Byanyima, hamwe n'abaharanira uburenganzira bwa muntu, bakomeje gusaba ko yarekurwa nibura ku mpamvu z'uburwayi kugira ngo avurwe n'abaganga yigenga, aho kuvurirwa gusa n'abaganga bashyizweho na Leta.

Ubushinjacyaha bwa Uganda bushinja Dr. Besigye n'abo bareganwa umugambi wo guhirika ubutegetsi bwa Perezida Yoweri Museveni, ibirego we n'abamwunganira bahakana bavuga ko bifite impamvu za politiki. Nyuma yo kugwa mu rukiko, iburanisha ryasubitswe kugira ngo yitabweho.

Dr. Kizza Besigye ni umwe mu banyapolitiki bazwi cyane muri Uganda. Yigeze kuba muganga wa Perezida Museveni ndetse banakorana mu rugamba rwo kubohora igihugu, ariko nyuma aza kuba umwe mu bamunenga cyane.

Yahatanye na Perezida Museveni mu matora ya perezida inshuro enye, ndetse imyaka myinshi amaze ari umwe mu bayobozi bakomeye batavuga rumwe n'ubutegetsi. Afungwa kwe n'urubanza rwe bikomeje gukurikiranwa n'imiryango mpuzamahanga iharanira uburenganzira bwa muntu, isaba ko habaho ubutabera buboneye no kubahiriza uburenganzira bwe.

 

 

Like This Post?

• Share On:

Related Posts

---