• Umwuzure ukomeye muri nepal na tibet umaze guhitana abantu 469

Abantu nibura 469 bamaze gutakaza ubuzima muri Nepal, mu gihe abandi babarirwa mu magana bakomeje kuburirwa irengero, nyuma y’umwuzure ukaze w’igihe gito wibasiye agace k’imisozi miremire ya Himalaya gaherereye hafi y’umupaka wa Nepal na Tibet.

Uyu mwuzure wabaye ku wa Gatatu, tariki ya 26 Kanama 2026, ukurikira ihirima ry’igice kinini cy’urubura rwo ku misozi, bigatuma amazi menshi, ibyondo, amabuye n’ibiti byiruka mu bice bituwe n’abantu ku muvuduko ukomeye.

Amazi yatwaye amazu, ibiraro n’imihanda, asenya ibikorwa remezo byinshi ndetse anangiza inzira ikomeye ihuza Nepal na Tibet.

Muri Tibet, abantu batatu na bo bamaze kwemezwa ko bapfuye, mu gihe abarenga 550 bakomeje kuburirwa irengero. Kugeza ubu, ntiharamenyekana niba imibare yatangajwe muri Nepal na Tibet hari abantu bashobora kuba babarwa kabiri.

Ibikorwa byo gutabara birakomeje

Abatabazi, abasirikare n’abapolisi bakomeje gushakisha abantu bashobora kuba bakiri bazima munsi y’ibisigazwa by’amazu, ibyondo n’amabuye.

Icyakora, ibikorwa by’ubutabazi biragorana kubera ko hari impungenge z’uko undi mwuzure ushobora kuba. Abategetsi bavuga ko hafi y’umupaka wa Nepal n’Ubushinwa havutse ikiyaga cy’amazi menshi nyuma y’uko urubura, amabuye n’ibyondo byamanutse ku bwinshi.

Hari impungenge ko amazi y’icyo kiyaga ashobora kuzamuka akarenza inkombe, bigateza undi mwuzure ushobora kongera kwibasira uduce tumaze kwangizwa.

Abashinzwe ubutabazi basabwe gukomeza kugira amakenga, mu gihe inzego zibishinzwe zikurikirana uko amazi ari kwiyongera.

Ihinduka ry’imiterere y’imisozi riri gukurikiranwa

Abategetsi bo muri ako gace bavuga ko ihirima ry’urubura rwo ku misozi, rizwi nka glacier, ari ryo ryabaye intandaro y’uyu mwuzure ukomeye.

Amazi menshi yatewe n’iryo hirima yanyuze mu ngo no mu mihanda, atwara ibikoresho bitandukanye ndetse asenya byinshi mu byari hafi y’imigezi n’imibande.

Abahanga mu by’ikirere n’imiterere y’imisozi bakomeje gukurikirana uko ibintu bihagaze, kuko uduce two muri Himalaya dukunze guhura n’imvura nyinshi, ihinduka ry’ubushyuhe n'ibindi.

Agace gakunze gusurwa na ba mukerarugendo

Aka gace ka Himalaya ni kamwe mu duce dusurwa cyane na ba mukerarugendo, cyane cyane abajya gutembera mu misozi no gusura ahantu nyaburanga.

Buri mwaka, abantu babarirwa mu bihumbi byinshi basura aka gace, bituma hari impungenge ko bamwe mu baburiwe irengero bashobora kuba ari ba mukerarugendo cyangwa abakozi bakoraga muri ako karere.

Kugeza ubu, ibikorwa byo gushakisha no gutabara birakomeje, mu gihe inzego z’ubutabazi zikomeje kugerageza kugera ku bantu bari mu duce twibasiwe cyane n’umwuzure.

Abategetsi barasaba abaturage bo mu bice bishobora kwibasirwa gukurikiza amabwiriza yo kwimuka no kwirinda kwegera imigezi, imisozi cyangwa ahantu hashobora kongera gutemba amazi n’ibyondo.

Imibare y’abapfuye n’ababuriwe irengero ishobora gukomeza guhinduka, mu gihe ibikorwa byo gushakisha abarokotse no kumenya abahitanywe n’umwuzure bikomeje.

Like This Post?

• Share On:

Related Posts

---