• Perezida Kagame yagiranye ibiganiro na Denis Sassou Nguesso i Paris

 Ku ruhande rw’Inama Mpuzamahanga yiga ku byerekeye ibyogajuru n’ikirere (International Space Summit) iri kubera i Paris, Perezida wa Repubulika y’u Rwanda, Paul Kagame, yagiranye ibiganiro na Perezida wa Repubulika ya Congo, Denis Sassou Nguesso.

Aba bayobozi bombi bongeye gushimangira umubano ukomeye kandi umaze igihe hagati y’u Rwanda na Repubulika ya Congo, ndetse baganira ku ngingo z’ingenzi zihuriweho n’ibihugu byombi.

Mu biganiro byabo, Perezida Kagame na Perezida Sassou Nguesso banaganiriye ku bibazo bitandukanye bireba umugabane wa Afurika, bashimangira ko hakenewe ibisubizo bifatika, birambye kandi biyobowe n’Abanyafurika ubwabo.

Aba Bakuru b’Ibihugu kandi bagarutse ku kamaro ko gukomeza ubufatanye no gushakira hamwe ibisubizo ku bibazo byugarije umugabane, mu rwego rwo guteza imbere amahoro, umutekano n’iterambere rirambye.

U Rwanda na Repubulika ya Congo bifitanye umubano wa dipolomasi umaze imyaka, aho ibihugu byombi bikomeje gushaka uburyo bwo kurushaho guteza imbere ubufatanye mu nzego zitandukanye.

Like This Post?

• Share On:

Related Posts

---