FERWABA All Star Game 2023: Team Nshobozwa yatsinze Team Turatsinze

Ku wa Gatandatu tariki ya 23, Nibwo Ikipe ya Nshobozwa yegukanye igikombe nyuma yo gutsinda ikipe ya Turatsinze amanota 99-89 mu mukino w’Intoranywa muri Shampiyona ya Basketball mu Rwanda "FERWABA All Star Game 2023" .

Ni umukino wasozaga umwaka w’imikino wa 2022-23 muri Basketball, wabanjirijwe no guhatana mu gutsinda amanota 3 ndetse na "Slum Dunk". Aba uko ari 3 buri umwe yahembwe ibihumbi 500.

Mu manota 3 mu bagore umwanya wa mbere wegukanywe na Micomyiza Rosine ‘Cisse’ usanzwe ukinira REG W BBC ni mu gihe mu bagabo Munyeshuri Thierry Kigali Titans ari we wahize abandi. Muri "Slum Dunk", Dondon Elisée wa Espoir BBC ni we wegukanye umwanya wa mbere.

Team Turatsinze yatangiye neza ibifashijwemo na kapiteni wayo, Turatsinze Olivier itsinda agace ka mbere ku manota 30-26 ya Team Nshobozwa.

Team Nshobozwa yagarutse mu gace ka kabiri ubona irimo ihatana cyane maze ibifashijwemo n’abarimo Munyeshuri Thierry batsinze agace kabiri ku manota 36 kuri 29. Bagiye kuruhuka banganya 59-59.

Yakomerejeho inatsinda agace ka 3 ku manota 23 kuri 18. Team Nshobozwa yanatsinze agace ka kane ku manota 17-12 maze yegukana umukino ku manota 99-89 aho Kamndoh Frank wa Team Nshobozwa ni we watsinze amanota menshi aho yatsinze 33 ni mu gihe Fulla Rolly yabaye MVP wa All Star Game.

Muri uyu mukino kandi hashimiwe Kami Kabange wasezeye mu ikipe y’igihugu ya Basketball. Uyu mugabo ufite n’Ubwenegihugu bwa DR Congo yakiniye amakipe atandukanye nka ASB Mazembe yo muri DR Congo, APR BBC, City Oilers, Espoir BBC na REG BBC agikinira uyu munsi.