• Umuhanda uhuza Gasabo na Rulindo ntukiri nyabagendwa

Ubuyobozi bw’Umujyi wa Kigali bwatangaje ko umuhanda uhuza Akarere ka Gasabo n’aka Rulindo mu Ntara y’Amajyaruguru wafunzwe kubera ikamyo yangije ikiraro cy’ibyuma mu gitondo cyo kuri uyu wa 23 Ukwakira 2026.

Uyu muhanda uca mu Kagari k’Agateko mu Murenge wa Jali, Buhiza na Nyakabungo, ugakomereza muri Rulindo.  Kuva mu gitondo, nta modoka ziri kuwunyuramo bitewe n’iyi mpanuka.

Umuturage wo mu Karere ka Gasabo yagize ati “Muri iki gitondo, imodoka yari yikoreye umucanga yakinyuzeho, bya byuma byo hasi biravunika, hanyuma amapine yinjiramo hafi yo kugwamo hasi, iheramo. Yafunze ibindi binyabiziga byose.”

Ubuyobozi bw’Umujyi wa Kigali bwatangaje ko imodoka zose, nini n’intoya, zidashobora kunyura kuri iki kiraro, keretse abanyamaguru gusa.

Umuturage wo mu Karere ka Gasabo yatangaje ko iki kiraro cyashaje cyane, asobanura ko abaturage bari basanzwe bifatanya mu kugisana ariko ko ubu bigoye.

Ati “Ni ikiraro gikuze. Kimaze igihe kinini cyane, kimaze imyaka irenga 30 gikoreshwa. Iki kiraro cyarashaje, kimaze igihe gishwanyagurika. Icyo twabonye ni uko ibyuma byo hasi ni byo byashize, byarashaje.”

Ubuyobozi bw’Umujyi wa Kigali bwatangaje ko buri gukora ibishoboka byose kugira ngo iki kiraro gisanwe, cyongere gikoreshwe mu gihe gito gishoboka.

Like This Post?

• Share On:

Related Posts

---