• Igikomangomakazi cya Maroc, Lalla Asmaa cyasuye urwibutso rw Jenoside rwa Kigali

Igikomangomakazi cya Maroc, Lalla Asmaa, mushiki w’Umwami Mohammed VI, yatangaje ko avuye mu Rwanda afite umutima uremerewe n’amateka ya Jenoside yakorewe Abatutsi mu 1994, ariko kandi yuzuye icyizere bitewe n’uburyo Abanyarwanda bashoboye kwiyubaka, kunga ubumwe no kurenga amateka ababaje banyuzemo.

Yabitangaje ku wa Kabiri, tariki ya 27 Ukwakira 2026, ubwo yasuraga Urwibutso rwa Jenoside rwa Kigali ruherereye ku Gisozi, aho yunamiye inzirakarengane zazize Jenoside yakorewe Abatutsi mu 1994.

Iki gikomangomakazi cyari giherekejwe n’itsinda ry’abayobozi bo muri Maroc. Lalla Asmaa yashyize indabo ku mva rusange zishyinguyemo imibiri y’abazize Jenoside, afata n’umunota wo kubunamira.

Lalla Asmaa yakiriwe, asobanurira amateka yarwo n’akamaro rufite mu kubungabunga ibimenyetso bya Jenoside no kwigisha amateka yayo. Iki gikorwa cyanitabiriwe na Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène.

Yasuye ibice bitandukanye by’uru rwibutso, asobanurirwa amateka y’uko abayikoze bayiteguye bakanashyira mu bikorwa Jenoside yakorewe Abatutsi, ubuhamya bw’abayirokotse n’ingaruka yasize ku Banyarwanda.

Yanasobanuriwe urugendo rw’u Rwanda rwo kwiyubaka no kwimakaza ubumwe n’ubwiyunge.

Mu butumwa yanditse mu gitabo cy’abashyitsi cy’Urwibutso rwa Jenoside rwa Kigali, Lalla Asmaa yavuze ko ibyo yabonye byamukoze ku mutima, ariko bikamuha n’icyizere.

Yagize ati: “Urwibutso rw’abazize Jenoside ni gihamya ya rimwe mu mahano akomeye kurusha ayandi yabayeho mu mateka y’inyokomuntu. Mvuye mu Rwanda uyu munsi mfite umutima uremerewe, ariko nanone wuzuye icyizere, kubera ubushobozi bw’u Rwanda bwo kurenga kuri ibi bihe bibabaje, ndetse n’ubumwe no kongera kwiyubaka kw’abaturage barwo b’indashyikirwa. Mukomeze kuba ikimenyetso cy’icyizere.”

Igikomangomakazi cya Maroc Lalla Asmaa yunamiye aho yunamiye inzirakarengane zazize Jenoside yakorewe Abatutsi mu 1994, asiga ubutumwa bw’icyizere ku Rwanda

Uru Rwibutso rwa Jenoside rwa Kigali rwafunguwe mu 2004, rushyinguyemo imibiri y’inzirakarengane zirenga ibihumbi 250 zazize Jenoside yakorewe Abatutsi mu 1994.

Nyuma yo gusura uru rwibutso, Lalla Asmaa yanasuye Ingoro Ndangamurage y’Urugamba rwo Guhagarika Jenoside iherereye ku Nteko Ishinga Amategeko, ahasobanuwe amateka y’urugamba Ingabo za RPA zarwanye zigahagarika Jenoside muri Nyakanga 1994.

Igikomangomakazi Lalla Asmaa ari mu Rwanda mu ruzinduko rugamije gushimangira umubano n’ubufatanye hagati y’ibihugu byombi, by’umwihariko mu bijyanye no kwita ku buzima bw’abafite ubumuga bwo kutumva.

Ku wa Mbere, tariki ya 26 Ukwakira 2026, Lalla Asmaa na Madamu Jeannette Kagame bafunguye ikigo cyihariye mu gusuzuma no kuvura indwara z’amatwi no gufasha abafite ubumuga bwo kutumva, giherereye mu Bitaro bya Gisirikare bya Kanombe.

Iki kigo cyashyizweho ku bufatanye bwa Imbuto Foundation na Fondation Lalla Asmaa, hagamijwe kwagura serivisi z’ubuvuzi bwihariye no gufasha abana bafite ibibazo byo kutumva.

Muri ubwo bufatanye, abarwayi 50 b’Abanyarwanda bateganyirijwe gushyirwamo utwuma tubafasha kumva, mu gihe abandi 56 bateganyirijwe guhabwa utwuma twongera ubushobozi bwo kumva.

Ibikorwa by’uru ruzinduko biri mu rwego rwo gushimangira ubufatanye hagati y’u Rwanda na Maroc mu nzego z’ubuzima, imibereho myiza n’ubutabazi.

 

Like This Post?

• Share On:

Related Posts

---