• Brig Gen Patrick Karuretwa, yasabye abakozi ba Leta gushyira umuturage kw’isonga

Umuvugizi w’Ingabo z’u Rwanda, akaba n’Umuyobozi Mukuru ushinzwe Ubutwererane Mpuzamahanga mu bya Gisirikare muri Minisiteri y’Ingabo, Brig Gen Patrick Karuretwa, yasabye abakozi ba Leta guhuza inshingano zabo za buri munsi n’intego z’iterambere ry’igihugu, kugira ngo ibikorwa bakora bigire uruhare rufatika mu kuzamura imibereho y’abaturage.

Yabigarutseho kuri uyu wa Gatatu, tariki ya 28 Ukwakira 2026, ubwo yagezaga ikiganiro ku bitabiriye amahugurwa yiswe National Induction Programme, abera mu Kigo cy’Amahugurwa ya Gisirikare cya Gabiro, mu Karere ka Gatsibo.

Aya mahugurwa agamije kunoza imikoranire n’ubufatanye hagati y’abakozi ba Leta, kongera kubazwa inshingano no guteza imbere itangwa rya serivisi nziza zishyira umuturage ku isonga, hagamijwe kugera ku ntego z’iterambere ry’igihugu.

Ikiganiro cya Brig Gen Karuretwa cyari gifite insanganyamatsiko igira iti: “Kuva ku cyerekezo cy’igihugu kugera ku nshingano zo guteza imbere abaturage.” Cyibanze ku ruhare rw’abakozi ba Leta mu guhindura icyerekezo cy’igihugu gahunda n’ibikorwa bifatika biteza imbere imibereho y’abaturage, bikanoza imikorere y’inzego za Leta kandi bigashyigikira iterambere rirambye.

Ageza ikiganiro ku bitabiriye icyiciro cya mbere, Brig Gen Karuretwa yashimangiye ko abakozi ba Leta bafite uruhare rukomeye mu iterambere ry’igihugu, asobanura ko bisaba ubwitange mu gukorera abaturage, guhuza imikorere n’ibyifuzo byabo no gufata ibyemezo bibateza imbere.

Yagize ati: “Inzego za Leta ni zo zikoreshwa mu guhindura icyerekezo ukuri kugaragara. Iyo zitabayeho, Icyerekezo 2050 cyaba inyandiko nziza ibitse mu kabati.”

Yakomeje asobanura ko Icyerekezo cy’u Rwanda cya 2050 kitagamije gusa kongera amafaranga abaturage binjiza, ahubwo ko kinibanda ku mibereho myiza yabo.

Ati: “Intego yacyo ya kabiri ni uko buri Munyarwanda agira imibereho myiza, kubaho igihe kirekire kandi afite ubuzima bwiza, kubona akazi keza, gutura mu nzu igezweho, kugira umutekano no kugeza serivisi nziza ku muturage aho kugira ngo abe ari we usiragira azishakisha.”

Atanga urugero ku nshingano z’Ingabo z’u Rwanda, Brig Gen Karuretwa yasobanuye ko Gahunda ya Kabiri y’Igihugu yo Kwihutisha Iterambere (NST2) ishyira amahoro n’umutekano mu nkingi z’imiyoborere zigamije guhindura imibereho y’abaturage, kandi ko ari imwe mu nshingano z’ibanze za RDF.

Yashimangiye ko Ingabo z’u Rwanda zisobanukiwe ko zikorera abaturage, agaragaza ko buri mwaka, binyuze muri Gahunda y’Ibikorwa by’Inzego z’Umutekano mu Iterambere, abasirikare, abaganga n’inzobere mu bwubatsi bakorana n’abayobozi b’inzego z’ibanze mu bikorwa bigamije kuzamura imibereho y’abaturage.

Yavuze ko ubwo bufatanye bugira uruhare mu gukemura ibibazo by’abaturage no kwihutisha iterambere ry’igihugu.

Brig Gen Karuretwa yasabye abitabiriye aya mahugurwa kwisuzuma bakareba uburyo inshingano basohoza buri munsi zihuzwa n’intego z’iterambere u Rwanda rwihaye, ndetse n’uko bashobora kunoza imikorere yabo kugira ngo itange umusaruro ugaragarira abaturage.

Aya mahugurwa azamara ukwezi kumwe, azitabirwa n’ibyiciro bine, buri cyiciro kikazaba kigizwe n’abagera kuri 200 baturuka mu nzego zitandukanye za Leta.

Mu biganiro bazahabwa, hazibandwa ku ngingo z’ingenzi zirimo Icyerekezo cy’u Rwanda cya 2050 na Gahunda ya Kabiri y’Igihugu yo Kwihutisha Iterambere (NST2), hagamijwe kubafasha gusobanukirwa neza uruhare rwabo mu ishyirwa mu bikorwa ry’izo gahunda.

 

Like This Post?

• Share On:

Related Posts

---