Yanditswe na: NSANZABERA Jean Paul
11/11/2026 16:19
Ambasade y’u
Rwanda muri Leta Zunze Ubumwe za Amerika, ifatanyije n’Umunyamuryango wa
Kongere y’Amerika, Trent Kelly, yateguye amasengesho yo gusengera ubufatanye
bw’u Rwanda na Amerika (U.S.–Rwanda Congressional Prayer Breakfast).
Iki gikorwa
cyahuje bamwe mu bagize Kongere ya Amerika n’inshuti z’u Rwanda, hagamijwe
gushimangira umubano hagati y’ibihugu byombi no gukomeza kubaka ku bufatanye
bisanzwe bifitanye.
Iyi sengesho
ryari rigamije guhuriza hamwe abayobozi
n’inshuti z’u Rwanda kugira ngo baganire ku buryo bwo gukomeza guteza imbere
umubano n’imikoranire hagati y’ibihugu byombi.
U Rwanda na
Leta Zunze Ubumwe za Amerika bifitanye umubano w’ubufatanye mu nzego
zitandukanye, kandi ibikorwa nk’ibi bitanga umwanya wo guhuriza hamwe abantu
bafite uruhare mu guteza imbere iyo mikoranire.
U ijambo rye
Trent Kelly yashimye u Rwanda
n’ubuyobozi bwarwo, avuga ko ari igihugu cyihariye kandi ko Perezida Paul
Kagame agira uruhare mu iterambere ry’u Rwanda ndetse n’umugabane wa Afurika
muri rusange.
Yagize ati “U
Rwanda ni igihugu cyihariye, na Perezida Kagame ni umuyobozi wihariye. Ibikorwa
bye bigirira akamaro u Rwanda gusa, ahubwo n’umugabane wa Afurika wose.”
Kelly
yakomeje ashimangira ko Leta Zunze Ubumwe za Amerika zikwiye gukomeza gushora
imbaraga mu mubano n’ibihugu bifatanya na byo mu guteza imbere imibereho
y’abaturage no guteza imbere Afurika.
Yagize ati:
“Tugomba gushyigikira inshuti zacu zikomeye hirya no hino ku Isi. Iyo tubonye
abantu bakora ibintu byiza, mu buryo bukwiye kandi babikuye ku mutima, dukwiye
kubashyigikira no gushora imbaraga muri bo.”
Yasoje
agaragaza ko akomeza gufata u Rwanda nk’inshuti ya Amerika, ati: “Buri gihe
nshimishwa no kuvuga ko u Rwanda ari inshuti yacu, kandi ko bizakomeza kuba
uko.”
Iryo sengesho kandi uretse abayobozi n’abanyarwanda batandukaye baba muri Leta zunze ubumwe z’Amerika ryitabiriwe n’ Umunyamabanga wa Leta muri Minisiteri y’Ububanyi n’Amahanga n’Ubutwererane Dr. Usta Kaitesi n’ Ambasaderi w’u Rwanda muri Leta Zunze Ubumwe za Amerika Prof. Mathilde Mukantabana.
