Yanditswe na: NDAYISENGA Clement
11/11/2026 16:48
Umugabo witwa Ufitingufu Ildephonse w’imyaka 45 y’amavuko, wo mu Karere ka Nyamasheke, yasanzwe yapfiriye ku muhanda wa Kivu Belt, bikekwa ko yishwe n’umusore w’imyaka 24 y’amavuko bari bagiranye amakimbirane mu kabari, nyuma yo kumwima inzoga.
Ibi
byabereye mu Mudugudu wa Nduba, mu Kagari ka Karengera, mu Murenge wa Kilimbi, mu
Karere ka Nyamasheke, mu Ntara y’Iburengerazuba, mu ijoro ryo ku wa 10
Ugushyingo 2026.
Amakuru
y’ibanze avuga ko Ufitingufu yari ari mu kabari gaherereye mu isantere y’ubucuruzi
ya Kigarama, ahagana Saa Sita z’ijoro, ahura na Ntawukuriryayo Ephrem w’imyaka 24
y’amavuko, amusaba inzoga ariko arayimwima.
Ibyo
byakurikiwe n’amagambo akarishye hagati yabo, aho bivugwa ko Ntawukuriryayo
yatangiye gutuka Ufitingufu, amushinja kunanirwa kuyobora urugo rwe no guhora
agirana ibibazo n’umugore we.
Nyuma
yo kurakazwa n’ayo magambo, Ufitingufu yahisemo kuva mu kabari ajya iwe.
Amakuru avuga ko yahavuye afashe umuhoro, ashaka gutegera mu nzira umusore bari
bagiranye amakimbirane kugira ngo amwihimureho.
Gusa,
ubwo bahuriraga mu nzira, bivugwa ko Ntawukuriryayo yamurushije imbaraga, akamwaka
uwo muhoro, bikekwa ko ari na wo yakoresheje amwica.
Umunyamabanga
Nshingwabikorwa w’Umurenge wa Kilimbi, Uwizeye Emmanuel, yatangaje ko hari abantu
batanu bakekwaho kugira uruhare muri urwo rupfu, aho batatu muri bo bamaze
gutabwa muri yombi, barimo na nyina w’umwe mu bakekwa.
Yavuze
ko abamaze gufatwa bafungiye kuri Sitasiyo ya RIB ya Macuba, mu gihe abandi
bakekwa, barimo na nyiri akabari, bagishakishwa.
Uyu
muyobozi yasabye abaturage kwirinda ubusinzi n’amakimbirane ashobora gukururwa
no kunywa inzoga nyinshi. Yasabye kandi abafite utubari kubahiriza amasaha yo
gufunga no kwirinda guha inzoga abantu bamaze gusinda.
Umurambo wa Ufitingufu wajyanywe mu Bitaro bya Kibogora kugira ngo ukorerwe isuzuma, mu gihe iperereza rigikomeje kugira ngo hamenyekane neza icyateye urupfu rwe n’ababigizemo uruhare.
Like This Post? Related Posts
