• Amakuru / POLITIKI


Umutwe w’inyeshyamba z’Abahuti (Houthis) washyize hanze amashusho agaragaza ibyo uvuga ko ari imirwano ukomeje guhanganyemo n’ingabo za Leta ya Yemen mu ntara ya Marib, iherereye mu majyaruguru ashyira uburasirazuba bw’umurwa mukuru Sanaa.

Aya mashusho yashyizwe hanze ku wa Mbere, agaragaza ikoreshwa ry’imbunda ziremereye n’iziciriritse, ibisasu bya rutura (mortars) ndetse n’intwaro zirasa ibifaru. Agaragaramo kandi imodoka za gisirikare zigenda ku rugamba, izindi zigaragara zishya.

Mu itangazo ryayo, urwego rushinzwe itangazamakuru mu bya gisirikare rw’Abahuti rwavuze ko iyi mirwano yatumye ingabo zunganira Leta ya Yemen, zifashwa na Arabiya Sawudite, zisubira inyuma.

Icyakora, ayo makuru ntiyashoboye kugenzurwa n’amasoko yigenga, ndetse n’igihe aya mashusho yafatiwe nticyamenyekanye mu buryo bwigenga.

Ku rundi ruhande, ingabo za Leta ya Yemen zatangaje ko abasirikare bazo, bafatanyije n’imitwe y’abaturage biyemeje kurwanya inyeshyamba, bakomeje ibikorwa byo guhangana n’Abahuti ku rugamba.

Izo ngabo zavuze ko ibikorwa bikomeje mu turere twa Marib, Al Jawf na Taiz ndetse no ku zindi mirongo y’urugamba. Icyakora, ntacyo zavuze ku bivugwa ko ingabo zazo zasubiye inyuma muri Marib.

Ibi bibaye nyuma y’uko ingabo za Leta ya Yemen zitangije igikorwa cya gisirikare cyiswe Dawn of Yemen mu Ukwakira, zivuga ko kigamije kugarura inzego za Leta, gufata umurwa mukuru Sanaa no guhagarika ubutegetsi bw’Abahuti.

Intambara muri Yemen yatangiye mu 2014, ubwo Abahuti bigaruriraga umurwa mukuru Sanaa n'ibice byinshi byo mu majyaruguru y’igihugu. Ku rundi ruhande, Leta ya Yemen n’imitwe iyishyigikiye bigenzura ibice bimwe byo mu majyepfo n’ahandi mu majyaruguru.

Iyi ntambara imaze imyaka myinshi yarateje ikibazo gikomeye cy’ubutabazi, aho abaturage benshi bakomeje guhura n’inzara, ubukene no kubura serivisi z'ibanze.

 \

Like This Post? Related Posts
Andika igitekerezo
Recent Comments