03:37:41
BPlus Tv
Super Fresh
Rwanda Form
KeySoft
Matelas Dodoma
Paul Kagame na Madamu Jeannette Kagame batoreye aho batuye
Yanditswe na: DUSHIMIMANA Elias
2024-07-15 15:09:37 Amakuru
Kuri uyu wa Mbere tariki 15 Nyakanga 2024, Nibwo Umukandida wa FPR Inkotanyi ku mwanya w’Umukuru w’Igihugu, Paul Kagame ari kumwe na Madamu Jeannette Kagame, batoreye kuri site ya SOS Kagugu iherereye mu Murenge wa Kinyinya, mu Karere ka Gasabo aho basanzwe batuye, abo bifuza ko yayobora u Rwanda mu myaka itanu iri imbere ndetse n’abakandida ku mwanya w’abadepite.
Umukandida wa FPR Inkotanyi yagaragarije mu bikorwa byo kwiyamamaza ko yizeye gutsinda aya matora. Yabishingiye ku bwitabire bw’abamushyigikiye kuri site zitandukanye bwari hejuru.
Abandi bakandida bahatanira umwanya w’Umukuru w’Igihugu, Dr Frank Habineza w’ishyaka DGPR n’umukandida wigenga, Mpayimana Philippe na bo batoye mu ma saa yine.
Dr Habineza na we, nk’uko yari yabivuze ubwo yasozaga ibikorwa byo kwiyamamaza, kuri uyu wa 15 Nyakanga yashimangiye ko afite amahirwe 55% yo kwegukana umwanya w’Umukuru w’Igihugu.
Mpayimana watoreye kuri site ya Camp Kigali mu Karere ka Nyarugenge, yabwiye itangazamakuru ko na we yizeye intsinzi, ateguza abamushyigikiye ko bamwenyura ubwo Komisiyo y’igihugu y’amatora iraba itangaza iby’ibanze byavuye mu matora.
