England: Bruce Melodie yijanditse mu kinyoma cya Harmonize, Amaso yaheze mu kirere

Yanditswe: na DUSHIMIMANA Elias

Abaturage batuye mu Bwongereza barimo abanyarwanda bihebeye umuziki wo mu Karere ka Afurika y’Iburasirazuba baranenga abahanzi barimo Harmonize, Bruce Melodie na Khaligraphy Jones batigeze bagaragara mu gitaramo bagombaga gutaramirayo kuwa 20 Gicurasi 2023.

Byari byitezwe ko iki gitaramo cyari cyiswe "Harmonize and Friends"kiba ku wa 20 Gicurasi 2023 i Londres mu Bwongereza, icyakora uyu munsi wageze Harmonize yibereye muri Leta Zunze Ubumwe za Amerika mu gihe Bruce Melodie na we yibereye i Kigali.

Uretse Harmonize na Bruce Melodie, abandi bahanzi byavuzwe ko batumiwe muri iki gitaramo harimo Umunya-Nigeria Skales, Umunya-Uganda Spice Diana n’Umunya-Kenya Khaligraph Jones.

Mu ntangiriro za Mata 2023, Nibwo iki gitaramo cyatangiye kwamamazwa  icyakora abakunzi b’umuziki batuye mu Bwongereza bategereza ko bahabwa amakuru yacyo kugeza ubwo bamenye ko kitazaba, bakurayo amaso.

Si ubwa mbere ikinyoma nkiki cy’uko aba bahanzi bagiye gutaramana kibeshywe Abanyarwanda  kuko no mu 2022 Harmonize yababeshye igitaramo cyagombaga kubera i Kigali ku wa 18 Kamena 2022.

Ibitaramo bya ’Afro East Carnival’ byari byatangijwe na Harmonize wari wavuze ko bizazenguruka mu bihugu bitandukanye byiganjemo ibyo mu Karere ka Afurika y’Iburasirazuba, harimo n’u Rwanda.

Ni ibitaramo byagombaga gutangirira i Nairobi bigakomereza i Mombasa, i Bujumbura mu Burundi, i Dar es Salaam muri Tanzania n’i Kampala muri Uganda, mbere yo kugera i Kigali mu Rwanda ku wa 18 Kamena 2022, ubundi bigasorezwa i Londres mu Bwongereza.

Icyakora abakunzi b’umuziki mu Rwanda n’aha hose ibi bitaramo byagombaga kunyura, barategereje amaso ahera mu kirere, yewe uyu muhanzi nta n’icyo aravuga kuri ibi bitaramo bye bitabashije gukomeza.